काठमाडौंमा जेनजी आन्दोलनमा १४ जनाको मृत्यु, दर्जनौं घाइते

काठमाडौँ । सोमबार काठमाडौंमा हिंसात्मक बनेको जेनजी आन्दोलनमा मृत्यु हुनेको संख्या १४ पुगेको छ। स्वास्थ्य तथा जनसंख्या मन्त्रालयको विवरण अनुसार, ट्रमा सेन्टरमा ६, सिभिल अस्पतालमा ३, केएमसी अस्पतालमा १, त्रिवि शिक्षण अस्पतालमा १ र एभरेष्ट अस्पतालमा ३ जनाको मृत्यु भएको छ।

अहिलेसम्म घाइतेहरुको यकिन विवरण पुस्टि भएको छैन। मन्त्रालयले विभिन्न अस्पतालबाट तथ्याङ्क संकलन गर्दैछ। दिउँसो ४ बजेसम्मको विवरणअनुसार सबैभन्दा बढी घाइते सिभिल अस्पतालमा छन्। ट्रमा सेन्टरमा २४, केएमसी अस्पतालमा २०, त्रिवि शिक्षण अस्पतालमा १५ र एभरेष्ट अस्पतालमा ३४ जना घाइते छन्।

साथै, केही घाइतेलाई पाटन अस्पतालमा पनि पुर्‍याइएको छ, जहाँको विवरण मन्त्रालयले हाल संकलन गरिरहेको छ। अस्पतालमा उपचाररत घाइतेको संख्या बढ्दै गएपछि स्वास्थ्य व्यवस्था थप सुदृढ गर्न आवश्यक देखिएको छ। मन्त्रालयले घाइतेको तत्काल उपचार र सुरक्षा सुनिश्चित गर्न स्वास्थ्यकर्मीलाई निर्देशन दिएको छ।

घटनाले काठमाडौं उपत्यकामा तनावपूर्ण स्थिति सिर्जना गरेको छ। प्रहरी र प्रशासनले सुरक्षा व्यवस्था कडा पार्दै स्थिति नियन्त्रणमा ल्याउन प्रयास गरिरहेका छन्। आन्दोलनको क्रममा घाइते भएका नागरिकको स्वास्थ्य सुनिश्चित गर्न आवश्यक सबै कदम उठाइने मन्त्रालयले जनाएको छ।