नेपाल परिचय पुस्तकको परिमार्जित तेह्रौँ संस्करण सार्वजनिक(पुस्तक सहित)

काठमाडौं– सूचना तथा प्रसारण विभागले लामो समयदेखि प्रकाशन हुँदै आएको ‘नेपाल परिचय’ पुस्तकको परिमार्जित तेह्रौँ संस्करण सार्वजनिक गरेको छ । नेपालको समग्र परिचय दिने उद्देश्यले प्रकाशित हुँदै आएको यस पुस्तकमा यसपटक मुलुकको भौगोलिक, सामाजिक, सांस्कृतिक, आर्थिक, राजनीतिक र संवैधानिक विकासको विस्तृत विवरण समेटिएको छ ।

पुस्तकले नेपालको विविधता, जाति, भाषा, संस्कृति, धर्म र परम्पराहरूलाई समेट्दै राष्ट्रिय एकताको सन्देश दिने उद्देश्य राखेको विभागले जनाएको छ । संघीय लोकतान्त्रिक गणतन्त्रको अवधारणा अनुसार सबै नागरिकसम्म समान सूचना र यथार्थपरक जानकारी पुर्‍याउने लक्ष्यसहित पुस्तक प्रकाशित गरिएको हो ।

‘नेपाल परिचय’ पुस्तकले मेचीदेखि महाकाली र हिमालदेखि तराईसम्मका विविध पक्षलाई समेट्ने प्रयास गरेको छ । यसमा नेपालको संविधान, राज्यको नीति तथा कार्यक्रम, प्रतिनिधित्व र समावेशी शासन व्यवस्थाबारे समेत जानकारी प्रस्तुत गरिएको छ । यसले देशभित्रको मात्र होइन, अन्तर्राष्ट्रिय स्तरमा पनि नेपालको विशेष परिचय स्थापित गर्ने अपेक्षा गरिएको छ ।

सूचना तथा प्रसारण विभागका अनुसार पुस्तक तयार पार्दा भाषा, शैली र प्रस्तुतिमा सकेसम्म त्रुटिरहित बनाउन विशेष ध्यान दिइएको छ । यद्यपि अझै पनि कुनै कमजोरी भए पाठकवर्गबाट रचनात्मक सुझाव र पृष्ठपोषणको अपेक्षा गरिएको विभागले जनाएको छ ।

यस संस्करणको तयारीमा नेपाल सरकारका सञ्चार तथा सूचना प्रविधिमन्त्री माननीय पृथ्वी सुब्बा गुरुङ र सञ्चार सचिव श्रीमती राधिका अर्यालले मार्गनिर्देशन र कार्यप्रेरणा प्रदान गरेका थिए । साथै, विषयवस्तु सम्पादनका क्रममा त्रिभुवन विश्वविद्यालय इतिहास केन्द्रीय विभागका प्राध्यापकहरू प्रा.डा. बद्रीनारायण गौतम, डा. डोलराज काफ्ले र डा. हरिदत्त पाण्डेयको महत्वपूर्ण योगदान रहेको छ ।

विभागका अनुसार पुस्तक ‘नेपाल परिचय’ केवल एक प्रकाशन मात्र नभई, नेपालको सम्पूर्ण परिचय दिने विश्वसनीय दस्तावेज हो । यसले भविष्यमा पनि राष्ट्रको पहिचानलाई सबल बनाउन र नयाँ पुस्तालाई नेपालको ऐतिहासिक तथा सामाजिक यथार्थबारे जानकारी दिन महत्त्वपूर्ण भूमिका खेल्ने विश्वास लिइएको छ ।