काठमाडौँ । नेपाल धितोपत्र बोर्डका कर्मचारीले आफ्ना माग बेवास्ता भएको भन्दै आन्दोलनलाई निरन्तरता दिने घोषणा गरेका छन्। कर्मचारीहरूले विगत तीन सातादेखि अर्थ मन्त्रालयको निर्णयविरुद्ध आन्दोलन गर्दै आएका हुन्।
कर्मचारीहरूको प्रमुख मागमा सेवासुविधा कटौती गर्ने निर्णय फिर्ता लिनु र धितोपत्र बोर्डलाई पूर्ण स्वायत्त संस्था कायम गर्नु समावेश छन्। उनीहरूले बारम्बार ध्यानाकर्षण गराए पनि माग सम्बोधन नभएको भन्दै कार्य बहिष्कार र विरोध कार्यक्रमलाई निरन्तरता दिने बताएका छन्।
आन्दोलनका कारण हाल धितोपत्र बोर्डको नियमित कामकारबाही प्रभावित बनेको छ। यसले पुँजीबजार नियमन, नीति निर्माण र सुधार योजनामा प्रत्यक्ष असर पारेको छ। लगानीकर्ताहरूले पनि यसप्रति असन्तुष्टि जनाएका छन्।
सोमबार सेयर लगानीकर्ताहरूले बोर्ड कार्यालयमै पुगेर पुँजीबजार सुधारका काम अघि बढाउन र बोर्डको नियमावलीलाई प्रभावकारी रूपमा कार्यान्वयन गर्न माग गर्दै घेराबन्दी गरेका थिए। बोर्डले पुँजीबजार सुधार कार्यदलले तीन महिनाभित्र गर्ने भनिएका काम कार्यान्वयनको चरणमा रहेको प्रष्ट पारेपछि मात्र लगानीकर्ताहरू राति करिब १० बजेतिर फर्किएका थिए।
यसैबीच, आज बिहान ११ बजे धितोपत्र बोर्डका दुवै कर्मचारी युनियनले संयुक्त बैठक बस्ने भएका छन्। बैठकले आगामी आन्दोलनका कार्यक्रम र रणनीति तय गर्ने जनाइएको छ।
विश्लेषकहरूका अनुसार, नियामक निकायमै अस्थिरता देखिनु पुँजीबजारको स्थायित्वका लागि चिन्ताजनक छ। कर्मचारी मागलाई सम्बोधन नगरे दीर्घकालीन रूपमा बजारमा नकारात्मक असर पर्न सक्ने चेतावनी उनीहरूले दिएका छन्।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
