६३ जिल्लाका १३३ निर्वाचन क्षेत्रको मतपत्र छपाइ सम्पन्न

काठमाडौँ । आगामी फागुन २१ गते हुने प्रतिनिधिसभा सदस्य निर्वाचनका लागि ६३ जिल्लाका १३३ निर्वाचन क्षेत्रको मतपत्र छपाइ सम्पन्न भएको निर्वाचन आयोगले जनाएको छ। आयोगका अनुसार हालसम्म एक करोड ७१ लाख ६३ हजार मतपत्र छापिइसकेको छ।

निर्वाचन आयोगका सहायक प्रवक्ता प्रकाश न्यौपानेका अनुसार पहाडी तथा हिमाली जिल्लासहित देशका विभिन्न भूभागका ६३ जिल्लामा प्रयोग हुने मतपत्र छपाइ पूरा भइसकेको हो। छपाइ सम्पन्न भएका जिल्लामा कर्णाली, सुदूरपश्चिम, लुम्बिनी, गण्डकी र कोशी प्रदेशका अधिकांश निर्वाचन क्षेत्र समेटिएका छन्।

हाल काठमाडौं उपत्यका आसपासका १४ जिल्लाको मतपत्र छपाइ मात्र बाँकी रहेको आयोगले जनाएको छ। ती जिल्लाको मतपत्र आगामी तीन दिनभित्र छपाइ सम्पन्न हुने अनुमान गरिएको छ। छापिएका मतपत्रको प्याकिङ कार्यसमेत तीव्र गतिमा भइरहेको र हालसम्म १५ हजार ३७१ बाकस मतपत्र प्याकिङ भइसकेको आयोगले जानकारी दिएको छ। दैनिक करिब एक हजार बाकस प्याकिङ तथा ११ देखि १५ लाखसम्म मतपत्र छपाइ भइरहेको छ।

निर्वाचन प्रयोजनका लागि जनक शिक्षा सामग्री केन्द्र लिमिटेड, सानोठिमीमा गत पुस २२ गतेदेखि मतपत्र छपाइ सुरु गरिएको हो। पहिलो चरणमा १० लाख ९८ हजार २०० नमूना मतपत्र छपाइ गरी सम्बन्धित जिल्लाहरूमा पठाइसकिएको आयोगले जनाएको छ।

आयोगका अनुसार दोस्रो चरणमा कुल दुई करोड आठ लाख ३० हजार मतपत्र छपाइ गरी प्याकिङ तथा रुजु कार्यसमेत पूरा गरी ढुवानीका लागि तयारी गरिएको छ। प्रत्यक्षतर्फको निर्वाचनका लागि मात्र दुई करोड तीन लाख २३ हजार मतपत्र आवश्यक पर्ने आयोगको तथ्यांक छ।

त्यसैगरी छपाइ सम्पन्न भएका मतपत्र आजैदेखि कर्णाली प्रदेशका १० जिल्लाका १२ निर्वाचन क्षेत्रमा पठाउन थालिएको छ। सल्यान, रुकुमपश्चिम, डोल्पा, मुगु, हुम्ला, कालिकोट, जुम्ला, जाजरकोट, दैलेख र सुर्खेत जिल्लामा मतपत्र ढुवानी सुरु गरिएको सहायक प्रवक्ता न्यौपानेले जानकारी दिए।