काठमाडौँ । नेपाली कांग्रेसभित्र देखिएको आन्तरिक विभाजन कम गर्दै पार्टीका विभिन्न धारबीच संवाद, सहकार्य र एकता सुदृढ गर्ने उद्देश्यले युवा नेताहरूले नयाँ अभियान सञ्चालन गर्ने घोषणा गरेका छन्।
‘देश र कांग्रेस जोड्ने’ नाम दिइएको अभियानमार्फत सभापति गगन थापा नेतृत्वको पक्ष र संस्थापन इतर समूहबीच संवाद तथा सहकार्यको वातावरण निर्माण गर्ने लक्ष्य राखिएको आयोजकहरूले बताएका छन्।
नेविसंघका पूर्वअध्यक्ष नैनसिंह महर, रञ्जित कर्णलगायतको पहलमा सुरु गर्न लागिएको अभियानअन्तर्गत आगामी साउन २० गते ‘राष्ट्रिय एकता भेला’ आयोजना गरिने भएको छ। आइतबार आयोजित पत्रकार सम्मेलनमा आयोजकहरूले भेलामा पालिका, प्रदेशसभा तथा प्रतिनिधिसभा निर्वाचन क्षेत्रबाट प्रतिनिधित्व सुनिश्चित हुने गरी तयारी अघि बढाइएको जानकारी दिएका छन्।
आयोजकका अनुसार पछिल्लो समय कांग्रेसभित्र देखिएको संगठनात्मक कमजोरीले पार्टीको आन्तरिक एकतालाई प्रभावित बनाउनुका साथै लोकतान्त्रिक प्रणालीमै असर पर्न सक्ने अवस्था देखिएको छ। यस्तो अवस्थामा पार्टीभित्रको विभाजनबाट प्रतिगामी शक्तिले लाभ लिन सक्ने भन्दै विभिन्न धारबीच सहकार्य र एकताको वातावरण निर्माण गर्न अभियान आवश्यक रहेको उनीहरूको भनाइ छ।
अभियानका अगुवाहरूले ‘देश र कांग्रेस जोड्ने’ अभियान कुनै व्यक्ति, गुट वा पदकेन्द्रित नभएको स्पष्ट पारेका छन्। उनीहरूका अनुसार अभियानको मुख्य उद्देश्य कांग्रेसको संस्थागत सुदृढीकरण, आन्तरिक एकता कायम गर्नु तथा लोकतान्त्रिक मूल्य र मान्यताको संरक्षण गर्नु हो।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
