उच्च अदालतका न्यायाधीशमा तीन जनाको नाम सिफारिस

काठमाडौँ । न्याय परिषद्ले उच्च अदालतका न्यायाधीश नियुक्तिका लागि तीन जनाको नाम सिफारिस गरेको छ। परिषद्ले सर्वोच्च अदालतका रजिस्ट्रार भद्रकाली पोखरेलसहित जिल्ला न्यायाधीश हिमालय बेल्बासे र फैसला कार्यान्वयन निर्देशनालयका महानिर्देशक गजेन्द्रबहादुर सिंहको नाम सिफारिस गरेको हो।

भदौ ३० गते बसेको न्याय परिषद्को बैठकले तीनै जनालाई उच्च अदालतको न्यायाधीशका लागि सिफारिस गर्ने निर्णय गरेको हो।

परिषद्का अनुसार सर्वोच्च अदालतका रजिस्ट्रार पोखरेललाई उच्च अदालत सुर्खेतको न्यायाधीशमा सिफारिस गरिएको छ। त्यस्तै, कास्की जिल्ला अदालतका जिल्ला न्यायाधीश बेल्बासेलाई उच्च अदालत जनकपुर तथा फैसला कार्यान्वयन निर्देशनालयका महानिर्देशक सिंहलाई उच्च अदालत विराटनगरको न्यायाधीशमा सिफारिस गरिएको छ।

न्याय परिषद्को सिफारिसपछि सम्बन्धित प्रक्रिया पूरा गरी उनीहरूको उच्च अदालतको न्यायाधीशका रूपमा नियुक्ति हुने व्यवस्था छ।