काठमाडौँ । नेपालको डिजिटल भुक्तानी सेवाप्रदायक इसेवा लिमिटेडको प्रमुख कार्यकारी अधिकृत (सीईओ)मा निरज शर्मा नियुक्त भएका छन्।
इसेवा सञ्चालक समितिको भदौ ३० गते बसेको बैठकले शर्मालाई असोज १२ गतेदेखि लागू हुने गरी चार वर्षको कार्यकालका लागि सीईओ नियुक्त गर्ने निर्णय गरेको हो।
बैंकिङ तथा वित्तीय क्षेत्रमा २५ वर्षभन्दा बढीको नेतृत्वदायी अनुभव हासिल गरेका शर्मा ट्रान्जेक्सन बैंकिङ, कार्ड प्रणाली, डिजिटल रूपान्तरण तथा खुद्रा बैंकिङका क्षेत्रमा अनुभवी मानिन्छन्। डिजिटल नवप्रवर्तन, रणनीतिक वृद्धि तथा ग्राहककेन्द्रित सेवा विकासमा काम गरेको अनुभवसमेत उनीसँग रहेको कम्पनीले जनाएको छ।
कम्पनीका अनुसार शर्मा नेतृत्व तथा संस्थागत रूपान्तरणलाई प्रभावकारी रूपमा अघि बढाउन सक्ने अनुभव भएका व्यवस्थापक हुन्। बैंकिङ तथा डिजिटल वित्तीय सेवाको क्षेत्रमा उनको लामो अनुभवले इसेवाको आगामी रणनीति कार्यान्वयनमा योगदान पुग्ने अपेक्षा गरिएको छ।
इसेवा सञ्चालक समितिले शर्माको अनुभव, नेतृत्व क्षमता तथा डिजिटल वित्तीय सेवासम्बन्धी विज्ञताले कम्पनीका आगामी रणनीतिक प्राथमिकतालाई अघि बढाउन सहयोग पुग्ने विश्वास व्यक्त गरेको छ।
यसैबीच, इसेवाका निवर्तमान प्रमुख कार्यकारी अधिकृत जगदीश खड्काको चार वर्षे कार्यकाल पूरा भएको छ। खड्का २०७९ असोज १२ गते इसेवाको सीईओमा नियुक्त भएका थिए।
खड्काको व्यवस्थापकीय नेतृत्वमा इसेवाले आफ्नो सेवा, पहुँच तथा डिजिटल वित्तीय सेवाको दायरा विस्तार गरेको कम्पनीले जनाएको छ। उनको कार्यकालमा इसेवाका प्रयोगकर्ता, मर्चेन्ट तथा आधिकारिक प्रतिनिधिको संख्यामा वृद्धि हुनुका साथै विभिन्न नयाँ उत्पादन, सेवा तथा सुविधाको विकास र विस्तार गरिएको थियो।
कम्पनीका अनुसार खड्काको कार्यकालमा इसेवामा दर्ता भएका प्रयोगकर्ताको संख्या १ करोड ४० लाख तथा मर्चेन्टको संख्या ६ लाखभन्दा बढी पुगेको छ।
त्यस्तै, डिजिटल कर्जा सुविधा, फाइनान्स ३६०, इसेवा सर्कल, बिजनेस लिंक, बिजनेस एप, इन्टेन्ट पे, क्यालेन्डर तथा इभेन्ट सेवा, बीमा उत्पादन र विभिन्न जीवनशैलीसम्बन्धी सुविधाको विस्तार गरिएको कम्पनीले जनाएको छ।
यी सेवाको विस्तारमार्फत डिजिटल भुक्तानी तथा वित्तीय व्यवस्थापनलाई थप सहज, सुरक्षित र विविध बनाउन खड्काको नेतृत्वले महत्वपूर्ण भूमिका खेलेको इसेवाको भनाइ छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
