राजमार्ग, पुल र वैकल्पिक सडक पुनर्निर्माणमा १२ अर्ब बढी लागत अनुमान

काठमाडौँ — यस वर्षको मनसुनजन्य बाढीपहिरोका कारण क्षति पुगेका सडक, पुल र अन्य संरचनाको पुनर्निर्माणमा १२ अर्ब ३८ करोड रुपैयाँ लाग्ने अनुमान गरिएको छ। यो आकलन भौतिक पूर्वाधार तथा यातायात मन्त्रालयले देशभरका प्रमुख राजमार्ग, वैकल्पिक सडक र बेलिब्रिजको क्षति मूल्यांकनपछि गरेको हो।

मन्त्रालयका अनुसार, मुख्य राजमार्ग, वैकल्पिक सडक, बेलिब्रिज र स्थायी पुल पुनर्निर्माणका लागि १० अर्ब ६८ करोड रुपैयाँ आवश्यक पर्छ भने, गत वर्षको विपद्बाट बाँकी रहेका संरचनाहरू पुनर्निर्माणका लागि एक अर्ब ७० करोड रुपैयाँ थप लाग्नेछ।

ऊर्जा, जलस्रोत तथा सिँचाइ, भौतिक पूर्वाधार र सहरी विकास मन्त्री कुलमान घिसिङले अवरुद्ध सडक सञ्चालनलाई उच्च प्राथमिकतामा राखिएको बताए। उनले देशका विभिन्न भूभागमा सडक सञ्चालनका लागि उपकरण र जनशक्ति परिचालन गरी कामलाई निरन्तर अनुगमन गरिरहेको बताए।

मन्त्रालयका प्रारम्भिक विवरणअनुसार, यस वर्ष सबैभन्दा बढी क्षति मेची राजमार्गमा पुगेको छ जसको पुनर्निर्माणका लागि डेढ अर्ब रुपैयाँ लाग्ने अनुमान गरिएको छ। यस्तै, कोशी, मध्यपहाडी, हुलाकी, अरनिको, कान्ति र नारायणघाट–मुग्लिङ राजमार्गका पुनर्निर्माणका लागि झण्डै तीन अर्ब ७७ करोड रुपैयाँ लाग्नेछ।

क्षति पुगेका १७ वटा स्थायी पुल** पुनर्निर्माणका लागि चार अर्ब ५२ करोड रुपैयाँ आवश्यक पर्ने अनुमान छ भने, नयाँ बेलिब्रिज निर्माणका लागि ८० करोड रुपैयाँ र वैकल्पिक सडक पुनर्निर्माणका लागि एक अर्ब ५९ करोड रुपैयाँ खर्च हुने बताइएको छ। मन्त्री घिसिङका अनुसार, यी कार्यहरूलाई दीर्घकालीन दृष्टिकोणबाट गुणस्तरीय रूपमा सम्पन्न गर्न मन्त्रालयले विशेष योजना तयार गर्दैछ।