सरकारद्वारा राष्ट्रसेवक कर्मचारीको नयाँ तलबमान स्वीकृत, न्यूनतम तलब २८ हजार ९८४ रुपैयाँ

काठमाडौं । सरकारले राष्ट्रसेवक कर्मचारीका लागि नयाँ तलबमान स्वीकृत गरेको छ। प्रधानमन्त्री तथा मन्त्रिपरिषद्को कार्यालयले अर्थ मन्त्रालयले साउन ६ गते पेस गरेको तलबमान प्रस्ताव स्वीकृत गर्दै कार्यान्वयनका लागि सम्बन्धित निकायमा पठाएको हो।

स्वीकृत नयाँ तलबमानअनुसार अब राष्ट्रसेवक कर्मचारीको न्यूनतम मासिक तलब २८ हजार ९८४ रुपैयाँ र अधिकतम ९० हजार ५९४ रुपैयाँ कायम गरिएको छ।

नयाँ तलब संरचनाअनुसार मुख्यसचिवले सबैभन्दा बढी मासिक ९० हजार ५९४ रुपैयाँ तलब पाउनेछन्। नेपाली सेनाका प्रधानसेनापतिको तलब पनि मुख्यसचिवसरह कायम गरिएको छ। त्यसैगरी नेपाल प्रहरीका प्रहरी महानिरीक्षक (आईजीपी) को मासिक तलब ८४ हजार ५७६ रुपैयाँ निर्धारण गरिएको छ।

सबैभन्दा तल्लो तहका प्रथम स्तरका कार्यालय सहयोगीको मासिक तलब २८ हजार ९८४ रुपैयाँ कायम गरिएको सरकारले जनाएको छ।

अर्थमन्त्री डा. स्वर्णिम वाग्लेले चालु आर्थिक वर्षको बजेटमार्फत साउन १ गतेदेखि लागू हुने गरी राष्ट्रसेवक कर्मचारीको सुरु तलबमानमा १० प्रतिशत वृद्धि गर्ने घोषणा गरेका थिए। त्यससँगै कर्मचारीलाई थप १० प्रतिशत प्रोत्साहन भत्ता उपलब्ध गराउने व्यवस्था पनि गरिएको छ।

सरकारले निवृत्तिभरण प्राप्त गर्ने कर्मचारीका लागि पनि १० प्रतिशतले निवृत्तिभरण वृद्धि गर्ने निर्णय यसअघि नै सार्वजनिक गरिसकेको छ। नयाँ तलबमान स्वीकृत भएसँगै बजेटमा गरिएको घोषणा कार्यान्वयनको चरणमा प्रवेश गरेको छ।