काठमाडौं उपत्यकाबाट दसैं मनाउन बाहिरिनेको संख्या ह्वात्तै बढ्यो

काठमाडौं। आजदेखि नवरात्र सुरु भएसँगै बडादसैंको पहिलो दिन घटस्थापनापछि उपत्यका छाडेर गाउँ फर्किनेहरूको संख्या उल्लेख्य रूपमा बढेको छ। उपत्यका ट्राफिक प्रहरी कार्यालयले दिएको तथ्यांकअनुसार पछिल्लो २४ घण्टामा मात्रै ४३ हजारभन्दा बढी यात्रु उपत्यका बाहिरिएका छन्।

आइतबार बिहान ६ बजेदेखि सोमबार बिहान ६ बजेसम्मको अवधिमा ४३ हजार मानिस विभिन्न माध्यममार्फत बाहिरिँदा सोही अवधिमा करिब २८ हजार यात्रु उपत्यका भित्रिएका छन्। घटस्थापनादेखि बिदा औपचारिक रूपमा सुरु भइसकेकाले उपत्यका छाड्ने यात्रुको संख्या अझ बढ्ने अनुमान गरिएको छ।

ट्राफिक प्रहरीको भनाइअनुसार अधिकांश शैक्षिक संस्था तथा निजी कार्यालयमा दसैं बिदा सुरु भइसकेको छ भने सरकारी कार्यालयमा भने फूलपातीको दिनदेखि औपचारिक बिदा सुरु हुनेछ। यस कारणले पनि उपत्यका छाड्नेहरूको चाप निरन्तर बढिरहेको छ।

हालसम्म बसपार्क र उपत्यकाका विभिन्न नाकामा अवस्था सामान्य रहेको ट्राफिक प्रहरीले जनाएको छ। तर, गत शुक्रबारदेखि आइतबार बेलुकीसम्म करिब ४५ घण्टासम्म अवरुद्ध रहेको मुग्लिन–नारायणगढ सडकखण्डमा यात्रुले निकै कठिनाइ भोग्नुपरेको थियो। आज बिहानदेखि भने उक्त सडक पुनः सञ्चालनमा आइसकेको छ।

भौतिक पूर्वाधार तथा यातायात मन्त्री कुलमान घिसिङले शनिबार सरोकारवाला निकायलाई बोलाएर मुग्लिन–नारायणगढसहितका मुख्य सडक निरन्तर सञ्चालन गर्न निर्देशन दिएका थिए। यस कदमले यात्रुहरूलाई दसैंका बेला थप सहज बनाउन सहयोग पुर्‍याउने विश्वास लिइएको छ।