काठमाडौँ उपत्यकामा आज पनि हल्कादेखि मध्यम वर्षा हुनसक्ने सम्भावना

काठमाडौँ । काठमाडौँ उपत्यकामा सोमबार बिहानैदेखि हुस्सु लाग्नुका साथै मौसम आंशिकदेखि साधारणतया बदली रहने सम्भावना रहेको छ। दिउँसो तथा साँझ भने हल्कादेखि मध्यम वर्षा हुनसक्ने मौसम पूर्वानुमान महाशाखाले जनाएको छ।

महाशाखाका अनुसार उपत्यकामा आज खण्डित वर्षा हुने सम्भावना छ। उपत्यकाका सबै क्षेत्रमा एकै किसिमको वर्षा नहुने भएकाले कुनै स्थानमा बढी वर्षा हुनसक्ने तथा अन्य क्षेत्रमा हल्का वर्षा हुने वा वर्षा नहुने अवस्था रहन सक्ने जनाइएको छ।

दिउँसो र साँझ वर्षाको सम्भावना रहे पनि त्यसअघि उपत्यकामा घाम र बादलको मिश्रित अवस्था रहने पूर्वानुमान गरिएको छ। बिहान हुस्सु लागे पनि दिन बढ्दै जाँदा मौसममा केही सुधार आउने सम्भावना रहेको छ।

यसैबीच, भारतमा विकसित मौसम प्रणाली कमजोर भएसँगै नेपालमा पछिल्ला केही दिनदेखि भइरहेको लगातारको वर्षामा कमी आएको छ। आइतबार साँझदेखि वर्षाको क्रम उल्लेख्य रूपमा घटेको महाशाखाले जनाएको छ।

नेपालबाट मनसुन पूर्ण रूपमा बाहिरिन बाँकी रहेकाले देशका विभिन्न स्थानमा भने हल्कादेखि मध्यम वर्षा हुने क्रम अझै जारी रहने पूर्वानुमान गरिएको छ।