काठमाडौं । गोरखाको बूढीगण्डकी नदीमा आएको बाढीका कारण जोखिममा परेका ३६ जनाको नेपाली सेनाले उद्धार गरेको छ। बाढी प्रभावित विभिन्न क्षेत्रबाट उद्धार गरिएका व्यक्तिहरूमा एक शिशु र एक विदेशी नागरिकसमेत रहेका छन्।
नेपाली सेनाका अनुसार जगत क्षेत्रबाट ६ जना, न्याक्फेदीबाट ९ जना, यारुबाट एक शिशु र एक विदेशी नागरिकसहित ९ जना तथा पायु क्षेत्रबाट १२ जनाको उद्धार गरिएको हो। विभिन्न स्थानमा बाढीका कारण जोखिममा परेका नागरिकलाई सुरक्षित स्थानमा पुर्याइएको सेनाले जनाएको छ।
खोजी तथा उद्धार कार्यलाई तीव्र बनाउन नेपाली सेनाले चारवटा हेलिकोप्टर परिचालन गरेको छ। हेलिकोप्टरका अतिरिक्त स्थलमार्गबाट समेत सेना परिचालन गरी प्रभावित क्षेत्रमा उद्धार प्रयास जारी राखिएको छ।
सेनाका अनुसार अन्य सुरक्षा निकाय तथा सम्बन्धित सरोकारवालासँग समन्वय गरेर थप खोजी तथा उद्धार कार्य भइरहेको छ। बाढी प्रभावित क्षेत्रमा जोखिममा परेका अन्य व्यक्तिको अवस्था पहिचान गर्ने र आवश्यक उद्धार कार्यलाई निरन्तरता दिने प्रयास भइरहेको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
