सुरक्षा जोखिम बढेपछि इरानस्थित नेपालीलाई सतर्क रहन आग्रह

काठमाडौँ । अमेरिका र इरानबीच बढ्दो तनावलाई ध्यानमा राख्दै नेपाल सरकारले इरानमा रहेका नेपाली नागरिकलाई सकेसम्म चाँडो स्वदेश फर्किन आग्रह गरेको छ। परराष्ट्र मन्त्रालयले ट्राभल एड्भाइजरी जारी गर्दै हालको अवस्था सामान्य नभएसम्म इरान यात्रा नगर्न तथा यात्रा योजना स्थगित गर्न अनुरोध गरेको हो।

मन्त्रालयले जारी गरेको विज्ञप्तिमा हाल इरानमा रहेका नेपाली नागरिकलाई आफ्नो सुरक्षा प्राथमिकतामा राख्दै आवश्यक सतर्कता अपनाउन र सम्भव भएसम्म इरान छोड्न सल्लाह दिइएको छ। साथै, पासपोर्ट, परिचयपत्रलगायत महत्त्वपूर्ण कागजातहरू सजिलै भेटिने सुरक्षित स्थानमा राख्न पनि आग्रह गरिएको छ।

परराष्ट्र मन्त्रालयले समन्वय तथा आपतकालीन सहयोगका लागि इरानस्थित सम्बन्धित नियोग, नेपालस्थित परराष्ट्र मन्त्रालय तथा कतारस्थित नेपाली दूतावाससँग निरन्तर सम्पर्कमा रहन अनुरोध गरेको छ।

इरानमा कति नेपाली नागरिक रहेका छन् भन्ने यकिन तथ्यांक हाल उपलब्ध नभएको मन्त्रालयले जनाएको छ। सुरक्षा अवस्थाको निरन्तर मूल्यांकन गर्दै आवश्यक थप सूचना उपलब्ध गराइने पनि मन्त्रालयले स्पष्ट पारेको छ।