भोटेकोशी–त्रिशूली बाढीबारे प्रतिनिधिसभाबाट विशेष प्रस्ताव पारित

काठमाडौँ । रसुवामा भदौ १० गते भोटेकोशी–त्रिशूली नदीमा आएको विनाशकारी बाढीबाट उत्पन्न विपद्को अवस्थाबारे प्रतिनिधिसभाले विशेष प्रस्ताव पारित गरेको छ। बुधबार बसेको प्रतिनिधिसभाको बैठकले सभामुख डीपी अर्यालले प्रस्तुत गरेको प्रस्ताव सर्वसम्मतिले अनुमोदन गरेको हो।

बाढीको प्रभाव रसुवाको टिमुरे, स्याफ्रुवेशी र बेत्रावती हुँदै नुवाकोटको त्रिशूली बजार तथा देवीघाटसम्म परेको थियो। त्यसैगरी धादिङ, चितवन र गोरखाका त्रिशूली नदी आसपासका तटीय क्षेत्रसमेत बाढीबाट प्रभावित भएका छन्।

राष्ट्रिय विपद् जोखिम न्यूनीकरण तथा व्यवस्थापन प्राधिकरणबाट प्रस्तुत विवरणअनुसार बाढीपछि बेपत्ता भएकामध्ये हालसम्म १ हजार ११४ जनाको शव फेला परेको छ। फेला परेका शवमध्ये रसुवामा ४१, नुवाकोटमा १५५, धादिङमा ५९, चितवनमा ३४८, गोरखामा ६६, तनहुँमा ३८, नवलपरासी पूर्वमा २१७ र नवलपरासी पश्चिममा १९० जनाको शव रहेको छ।

प्राधिकरणको विवरणअनुसार बाढीको घटनापछि अझै ३ हजार ९१६ जना सम्पर्कविहीन छन्। विपद्मा परी २९२ जना घाइते भएका छन् भने प्रभावित क्षेत्रबाट हालसम्म ११ हजार ९९३ जनाको उद्धार गरिएको छ।

यसैबीच, प्रधानमन्त्री बालेन शाहले बुधबार प्रतिनिधिसभाको बैठकमा भोटेकोशी–त्रिशूली बाढीबाट उत्पन्न अवस्थाबारे सदनलाई जानकारी गराएका थिए। प्रधानमन्त्रीको जानकारीपछि प्रतिनिधिसभाले बाढीबाट भएको मानवीय तथा भौतिक क्षतिप्रति ध्यानाकर्षण जनाउँदै विशेष प्रस्तावमार्फत घटनाबारे आफ्नो धारणा औपचारिक रूपमा प्रस्तुत गरेको हो।