खनालः “व्यवसायिक पुनःस्थापनाका लागि अनुदान वा सस्तो ऋण दिने तयारी”

काठमाडौँ । अर्थमन्त्री रामेश्वरप्रसाद खनालले भदौ २३ र २४ गतेको जेनजी आन्दोलनका क्रममा भएको क्षति बीमा र वित्तीय प्रणालीले नसमेट्ने खालको भए सरकारले व्यहोर्ने बताएका छन्। शुक्रबार आर्थिक पत्रकारहरूसँगको भेटमा मन्त्री खनालले निजी क्षेत्रले व्यावसायिक सम्पत्तिमा भोगेको क्षतिको राहतका लागि सरकार गम्भीर भएको स्पष्ट पारे।

उनका अनुसार, बजार प्रक्रियाले वा बीमा प्रणालीले नपुगेका क्षतिहरूका लागि सरकारले विशेष व्यवस्था गर्ने तयारी गरेको छ। “कतिपय क्षति बीमा र बैंकिङ प्रणालीबाट कभर हुन्छ, तर बजारले नथाम्ने खालका क्षतिहरूमा सरकार आफैं अघि सर्छ,” मन्त्री खनालले भने। उनले क्षतिको आधिकारिक तथ्यांक संकलनका लागि टास्कफोर्स गठन गरिएको र त्यसमार्फत ‘लस’ तथा ‘ड्यामेज’ दुवैको विवरण संकलन भइरहेको जानकारी दिए।

खनालले व्यवसायिक पुनर्स्थापनाका लागि सरकार अनुदान वा सस्तो ब्याजदरमा ऋण (soft loan) प्रदान गर्ने तयारीमा रहेको बताए। “यो सरकारले आफ्नो कार्यकालभित्रै पुनःस्थापनाको काम पूरा गर्छ,” उनले जोड दिए।

उनले अहिलेको सरकार नीतिगत स्थिरताको बाटो तयार गर्ने उद्देश्यमा केन्द्रित रहेको पनि स्पष्ट पारे। निर्वाचनमुखी सरकारले अध्यादेशमार्फत कानुनी परिवर्तन गर्न राजनीतिक सहजता नभए पनि आगामी सरकारले सहज रूपले अघि बढाउन ग्राउन्डवर्क तयार पार्ने उनको भनाइ छ।