८१ करोड लागतमा बबरमहलमा सुविधासम्पन्न भवन निर्माण सम्पन्न

काठमाडौं । सरकारी स्वामित्वको नेपाल आयल निगमले बबरमहलस्थित सिंहदरबार दक्षिण गेट नजिकै अत्याधुनिक र सुविधासम्पन्न कर्पोरेट भवन निर्माण सम्पन्न गरेको छ। २०७२ वैशाखमा आएको भूकम्पले पुरानो कार्यालय भवन चर्किएपछि निगमले सो संरचना भत्काएर सोही स्थानमा नयाँ भवन निर्माण गरेको हो।

निगमका उपनिर्देशक तथा कर्पोरेट भवन निर्माण परियोजना प्रमुख रामकृष्ण बञ्जाराका अनुसार भवन निर्माण कार्य २०७८ मंसिर १९ गतेबाट औपचारिक रूपमा सुरु भएको थियो। ३० महिने प्रारम्भिक समयसीमा तोकिएको भए पनि केही समय थपेर सम्पूर्ण निर्माण कार्य सम्पन्न गरिएको उनले बताए।

८१ करोड रुपैयाँ (भ्याट र पीएस बाहेक) लागतमा बनेको उक्त भवनको निर्माण कार्य केसी समानान्तर रेलिगेयर जेभीले सम्पन्न गरेको हो, जसको लिड पार्टनर समानान्तर निर्माण सेवा रहेको निगमले जनाएको छ।

हाल नयाँ भवनमा विभिन्न विभागहरू सारिने कार्य सुरु भइसकेको छ। निगमका अनुसार नयाँ भवन अत्याधुनिक सुविधा सम्पन्न, ऊर्जा दक्ष र दीगो प्रयोगका लागि उपयुक्त संरचना हो, जसले निगमको प्रशासनिक कार्यक्षमता र सेवा प्रवाहमा सकारात्मक प्रभाव पार्ने अपेक्षा गरिएको छ।

चार वर्षअघि करिब ४९ अर्ब रुपैयाँ घाटामा पुगेको नेपाल आयल निगमले दुई वर्षअघि झन्डै १० अर्ब रुपैयाँ नाफा आर्जन गरेको प्रारम्भिक मूल्याङ्कन गरेको थियो। निगमका  अनुसार उक्त आर्थिक वर्षमा नाफा करिब १० अर्ब रुपैयाँको हाराहारीमा रहने देखिएको थियो, जुन त्यसअघिल्लो वर्ष करिब ११ अर्ब रुपैयाँमा सीमित भएको थियो।

पछिल्ला केही वर्षमा अर्बौँ रुपैयाँ नाफा आर्जन गर्न सफल भएको निगम दुई वर्षअघि बाह्य ऋणमुक्त अवस्थामा पुगेको थियो। ठाकुरका अनुसार मूल्य स्थिरीकरण कोष, विक्रेता र विमान सेवाहरूसँग रहेका धरौटी रकमसहित निगमको दायित्व करिब १८ देखि २० अर्ब रुपैयाँको हाराहारीमा सीमित भएको थियो, तर त्यसमा कुनै ब्याजको भार थिएन।

आर्थिक रूपमा सहज अवस्थामा पुगेको निगमले पेट्रोलियम पदार्थको मूल्य निर्धारण भने आफ्नो नियन्त्रणमा नरहेको स्पष्ट पारेको थियो। निगमको भनाइअनुसार मूल्य घटाउने वा बढाउने अधिकार सरकारको नीति र अन्तर्राष्ट्रिय बजार मूल्यमा निर्भर हुने गरेको थियो।