काठमाडौं – “पढ्न कहिल्यै ढिलो हुँदैन” भन्ने भनाइलाई एमाले उपाध्यक्ष तथा पूर्वअर्थमन्त्री सुरेन्द्र पाण्डेले जीवन्त उदाहरणका रूपमा प्रस्तुत गरेका छन्। ६७ वर्षीय पाण्डेले त्रिभुवन विश्वविद्यालयअन्तर्गत समाजशास्त्र विषयमा एमफिल (MPhil) अध्ययन गर्दै दुवै सेमेस्टरमा उत्कृष्ट नतिजा ल्याएका छन्।
त्रिवि समाजशास्त्र विभागका प्रमुख डा. पासाङ शेर्पाका अनुसार पाण्डेले एमफिलका दुवै सेमेस्टरमा सबै विषयमा उत्कृष्ट प्रदर्शन गरेका हुन्। “उहाँ निकै अनुशासित र परिश्रमी हुनुहुन्थ्यो। कक्षामा कहिल्यै अनुपस्थित हुनु भएन, सबै विषयमा टप गर्नुभयो,” शेर्पाले जानकारी दिए।
पाण्डेसँगै एमफिलमा अध्ययनरत उनकी धर्मपत्नी पूर्णशोभा चित्रकारले समेत प्रभावशाली नतिजा ल्याइन्। उनी सम्पूर्ण विद्यार्थीमध्ये तेस्रो स्थानमा परेकी हुन्। दम्पती दुवैजना शैक्षिक सत्र २०८०/८१ मा त्रिवि समाजशास्त्र विभागमा भर्ना भएका थिए।
शेर्पाका अनुसार उक्त सत्रमा कुल ३३ जना विद्यार्थीहरूले एमफिलमा अध्ययन गरेका थिए। तीमध्ये पाण्डे दम्पत्तिको शैक्षिक प्रतिबद्धता र उपलब्धिले अन्य विद्यार्थीहरूलाई पनि प्रेरणा दिएको विभागको भनाइ छ।
सार्वजनिक जीवनमा लामो अनुभव संगालेका पाण्डेले शैक्षिक यात्रामा पनि उत्तिकै समर्पण देखाएर ‘सदैव सिक्ने’ मान्यतालाई सशक्त रुपमा पुष्टि गरेका छन्।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
