काठमाडौँ । नेपाल टेलिकमले बाढीका कारण प्रभावित भएका दूरसञ्चार संरचनामध्ये थप चारवटा साइट पुनः सञ्चालनमा ल्याएको छ। कम्पनीले २०८३ भदौ १५ गते रसुवाका जिबजिबे र सरमथली, धादिङको बेनीघाट तथा नुवाकोटको त्रिशूली बजारस्थित साइट सुचारु गरेको हो।
नयाँ चार साइट सञ्चालनमा आएसँगै बाढीबाट प्रभावित भएका नेपाल टेलिकमका कुल १२० साइटमध्ये ११० वटा साइट पुनः सञ्चालनमा आएका छन्। बाँकी साइटलाई समेत यथाशीघ्र सञ्चालनमा ल्याउन प्राविधिक टोली परिचालन गरी मर्मत तथा पुनःस्थापनाको काम जारी रहेको कम्पनीले जनाएको छ।
रसुवाको जिबजिबे टावर सञ्चालनमा आएपछि भोर्ले, चिती, गाईसौरा, भोर्लेलगायत नौकुण्ड गाउँपालिकाका वडा नं. ५ र ६ का विभिन्न स्थानमा सञ्चार सेवा सहज हुने भएको छ।
त्यसैगरी सरमथली टावरबाट यार्सा, लच्याङ, सिमबन्दी, बिजिली जोङलगायत आसपासका क्षेत्रका सेवाग्राही लाभान्वित हुनेछन्। बाढीका कारण प्रभावित ती क्षेत्रका नागरिकलाई मोबाइल तथा अन्य दूरसञ्चार सेवा प्रयोगमा थप सहजता हुने कम्पनीले जनाएको छ।
धादिङको बेनीघाट साइट सञ्चालनमा आएपछि बेनीघाट बजार तथा आसपासका क्षेत्रमा सञ्चार सेवा नियमित हुने भएको छ। यस्तै, नुवाकोटको त्रिशूली साइट पुनः सञ्चालनमा आएपछि त्रिशूली बजार, ढुंगे तथा आसपासका क्षेत्रमा दूरसञ्चार सेवा सहज हुने नेपाल टेलिकमले जनाएको छ।
बाढीबाट क्षतिग्रस्त संरचनाको मर्मत तथा वैकल्पिक व्यवस्थामार्फत सेवा निरन्तरता दिने कामलाई प्राथमिकतामा राखिएको कम्पनीले जनाएको छ। बाँकी प्रभावित साइटसमेत क्रमशः सञ्चालनमा ल्याउने तयारी भइरहेको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
