सिटिजन लाइफ इन्स्योरेन्सको एमडीआरटी २०२५ कार्यक्रम भव्य रूपमा सम्पन्न

काठमाडौं । सिटिजन लाइफ इन्स्योरेन्स कम्पनीको एमडीआरटी २०२५ (मिलियन डलर राउन्ड टेबल) कार्यक्रम भव्य रूपमा सम्पन्न भएको छ। दुई दिने उक्त कार्यक्रम फागुन ९ र १० गते चितवनको भरतपुरस्थित सिराइचुली होटेलमा आयोजना गरिएको थियो।

कार्यक्रमको मुख्य उद्देश्य कम्पनीमा आबद्ध रही एमडीआरटी २०२५ का लागि छनोट भएका साथै कम्पनीले तोकेको व्यवसायिक लक्ष्य हासिल गर्न सफल उत्कृष्ट लिडरहरूलाई सम्मान गर्नुका साथै आउँदो समयका लागि आवश्यक व्यापार रणनीतिहरूबारे छलफल तथा प्रशिक्षण प्रदान गर्नु रहेको थियो। सिटिजन लाइफ इन्स्योरेन्स कम्पनीले हरेक वर्ष अघिल्लो आर्थिक वर्षमा उत्कृष्ट कार्य गरेका सिनियर एजेन्सी मेनेजरहरूलाई सो कार्यक्रममा सहभागी गराउँदै आएको छ।

उक्त कार्यक्रममा कम्पनीका प्रमुख कार्यकारी अधिकृत पोषकराज पौडेल, नायब प्रमुख कार्यकारी अधिकृत दीपबहादुर बी.सी., प्रमुख बजार व्यवस्थापन अधिकृत भूषण रिमाल, प्रमुख वित्तीय अधिकृत गोपाल पंगेनी, साथै उत्कृष्ट कार्य गर्दै छनोट भएका शाखा प्रमुखहरू र केही विभागीय प्रमुखहरू गरी ७० जनाको सहभागिता रहेको थियो।

यस कार्यक्रममा ४२ जना एमडीआरटी क्वालिफायर र ३ जना सी.ओ.टी. क्वालिफायरलाई खादा, माला, प्रमाणपत्र, र पुरस्कारसहित सम्मानित गरिएको थियो। यस कार्यक्रमको उद्देश्य सम्मान मात्र नभई उपस्थित सहभागीहरूलाई प्रशिक्षण प्रदान गर्नु पनि रहेको हुनाले उक्त कार्यक्रममा तालिम प्रदान गर्नका लागि अन्तर्राष्ट्रिय प्रशिक्षक तथा बीमा विशेषज्ञ हिमान्शु जोशीको उपस्थिति रहेको थियो।

कम्पनीले विश्वास लिएको छ कि यो कार्यक्रम प्रशिक्षित सहभागीहरूको क्षमता अभिवृद्धि गर्नका साथै व्यवसायमा सहयोगी हुनेछ। यस्तो किसिमको कार्यक्रमले लिडरहरूलाई उत्प्रेरित गर्ने, नयाँ सोच विकास गराउने, र प्रतिस्पर्धी वातावरणमा आफ्नो टिमलाई अझ सबल बनाउन मद्दत गर्ने कम्पनीको अनुभव रहेको छ।

कार्यक्रमको समापन अवसरमा प्रमुख कार्यकारी अधिकृत पौडेलले नवीनताको आधारमा सिटिजन लाइफ इन्स्योरेन्स अगाडि रहेको र कम्पनीको सफलतामा सिटिजन लिडरहरूको मुख्य भूमिका रहेको बताए। साथै, उनले आउँदा दिनमा व्यापार वृद्धि र व्यक्तिगत वृद्धिको उच्च सम्भाव्यता रहेको विचार प्रस्तुत गरे।