दसैँ मनाउन गाउँ फर्किनेको चाप बढ्यो, नौ दिनमा नयाँबसपार्कबाट दुई लाखभन्दा बढी यात्रु बाहिरिए

काठमाडौं। बडादसैँ नजिकिँदै जाँदा संघीय राजधानी काठमाडौंबाट घर फर्किने यात्रुको चाप बढेको छ। अध्ययन, रोजगारी तथा विभिन्न पेसा–व्यवसायका सिलसिलामा राजधानीमा बसोबास गर्दै आएका सर्वसाधारण दसैँ मनाउन गाउँ फर्किन थालेसँगै गोंगबुस्थित नयाँबसपार्कमा यात्रुको चहलपहल बढेको हो।
नयाँबसपार्क सञ्चालन गर्दै आएको लोत्से बहुउद्देश्यीय प्रालाका अनुसार असोज १७ देखि २५ गतेसम्म नौ दिनको अवधिमा मात्रै दुई लाख सात हजार २५१ यात्रु नयाँबसपार्क हुँदै राजधानीबाट बाहिरिएका छन्।
प्रालिका महाप्रबन्धक पंकज मल्लका अनुसार दसैँका लागि घर फर्किने यात्रुको संख्या दैनिक रूपमा उल्लेख्य देखिएको छ। उपलब्ध विवरणअनुसार असोज १७ गते १८ हजार ७२९, १८ गते १९ हजार ५३०, १९ गते २३ हजार १६ र २० गते २९ हजार ६०२ यात्रु राजधानीबाट बाहिरिएका थिए।
त्यस्तै, असोज २१ गते २२ हजार २८८, २२ गते २५ हजार २०१, २३ गते ३१ हजार २३५, २४ गते १६ हजार ९७० र २५ गते २९ हजार ३८० यात्रु नयाँबसपार्कबाट विभिन्न गन्तव्यतर्फ प्रस्थान गरेको मल्लले जानकारी दिए।
यात्रुको चाप बढेसँगै लामो तथा छोटो दूरीका सार्वजनिक सवारीसाधनको व्यवस्थापनमा चुनौती थपिएको छ। विशेषगरी राजमार्गमा देखिएका अवरोधका कारण सवारीसाधनको नियमित सञ्चालन प्रभावित हुँदा यात्रु व्यवस्थापनमा समस्या देखिएको यातायात व्यवसायीहरूले बताएका छन्।
नेपाल यातायात व्यवसायी राष्ट्रिय महासंघका महासचिव डेकनाथ गौतमले सडकको अवस्थाका कारण दसैँलक्षित यातायात व्यवस्थापन प्रभावित भएको बताए। उनका अनुसार असोज २३ गते अग्रिम बस टिकट बुकिङ खुला गरिएकै दिन धादिङको गलौँदीस्थित पृथ्वी राजमार्ग भासिएर सवारी आवागमन अवरुद्ध हुँदा ठूलो संख्यामा सवारीसाधन काठमाडौंमै रोकिएका थिए।
राजमार्ग अवरुद्ध हुँदा सवारीसाधन समयमै गन्तव्यमा पुग्न र फर्किन नसक्दा यात्रुको बढ्दो चापअनुसार यातायात सेवा सञ्चालन गर्न कठिनाइ भएको महासंघको भनाइ छ।
यसैबीच, महासंघले चाडपर्वका बेला सुरक्षित र व्यवस्थित यात्रा गर्न यात्रुहरूलाई आग्रह गरेको छ। यात्राअघि अनिवार्य रूपमा टिकट लिन, सरकारले निर्धारण गरेको भाडादरअनुसार मात्र भाडा तिर्न तथा सवारीसाधनको अवस्था बुझेर यात्रा गर्न महासंघले सुझाव दिएको छ।
बडादसैँ नेपालीहरूको प्रमुख चाड भएकाले परिवार तथा आफन्तसँग भेटघाट गर्न राजधानीबाट विभिन्न जिल्लातर्फ जाने यात्रुको संख्या हरेक वर्ष बढ्ने गरेको छ। यस वर्ष पनि दसैँ नजिकिँदै जाँदा नयाँबसपार्कसहित राजधानीका विभिन्न स्थानबाट घर फर्किने सर्वसाधारणको चहलपहल बढेको छ।