सर्वोत्तम पेन्ट्सको प्राथमिक शेयर बिक्री खुला, असार २ सम्म आवेदन दिन सकिने

काठमाडौं । सर्वोत्तम पेन्ट्स उद्योग लिमिटेडले सर्वसाधारण लगानीकर्ताका लागि प्राथमिक शेयर बिक्री खुला गरेको छ। कम्पनीले वैदेशिक रोजगारीमा रहेका नेपाली नागरिकका लागि छुट्याइएको शेयर बाँडफाँट सम्पन्न गरेपछि दोस्रो चरणअन्तर्गत सर्वसाधारणका लागि शेयर निष्कासन गरेको हो।

कम्पनीले आफ्नो ३४ करोड रुपैयाँ जारी पुँजीको २५ प्रतिशत बराबर ८ करोड ५० लाख रुपैयाँको ८ लाख ५० हजार कित्ता प्राथमिक शेयर निष्कासन गर्न अनुमति प्राप्त गरेको थियो। यसमध्ये वैदेशिक रोजगारीमा रहेका नेपालीका लागि छुट्याइएको ८५ हजार कित्ता शेयर तथा सामूहिक लगानी कोषका लागि छुट्याइएको ४२ हजार कित्ता शेयर यसअघि नै बाँडफाँट भइसकेको छ।

त्यसैगरी कम्पनीका कर्मचारीका लागि १७ हजार कित्ता शेयर सुरक्षित गरिएको छ। यी सबै कोटा छुट्याएपछि बाँकी रहेको ७ लाख ५ हजार ५०० कित्ता शेयर सर्वसाधारणका लागि बिक्रीमा ल्याइएको कम्पनीले जनाएको छ। उक्त शेयरको अंकित मूल्य प्रतिकित्ता १०० रुपैयाँ कायम गरिएको छ।

यस प्राथमिक शेयरमा लगानीकर्ताले न्यूनतम १० कित्तादेखि अधिकतम ५ हजार कित्तासम्म आवेदन दिन सक्नेछन्। आवेदन दिने अवधि असार २ गतेसम्म तोकिएको छ। सो अवधिमा पूर्ण आवेदन नपरेमा निष्कासन अवधि असार ११ गतेसम्म लम्बिन सक्ने व्यवस्था भए पनि हालको मागलाई हेर्दा निर्धारित प्रारम्भिक अवधिमै बिक्री बन्द हुने सम्भावना रहेको बताइएको छ।

शेयर निष्कासन तथा बिक्री व्यवस्थापकको जिम्मेवारी ग्लोबल आइएमई क्यापिटल लिमिटेडले पाएको छ। लगानीकर्ताले धितोपत्र बोर्डबाट स्वीकृति प्राप्त आस्बा सेवामा सहभागी बैंक तथा वित्तीय संस्थामार्फत आवेदन दिन सक्नेछन्। साथै, केन्द्रीय निक्षेप प्रणाली तथा कारोबार व्यवस्थापन कम्पनीको ‘मेरो शेयर’ प्रणालीमार्फत अनलाइन आवेदनको सुविधा पनि उपलब्ध रहेको छ।

यस निष्कासनका लागि मूल्याङ्कन संस्थाले कम्पनीलाई ‘दोहोरो बी माइनस’ स्तरको मूल्याङ्कन प्रदान गरेको छ। उक्त मूल्याङ्कनले कम्पनीको वित्तीय दायित्व पूरा गर्ने क्षमतामा मध्यम स्तरको जोखिम रहेको संकेत गर्ने जनाइएको छ।