एक सयभन्दा बढी शङ्कास्पद नक्कली उत्पादन नियन्त्रणमा

काठमाडौं । वाणिज्य, आपूर्ति तथा उपभोक्ता संरक्षण विभागले अनलाइन माध्यम तथा सामाजिक सञ्जालमार्फत बिक्री वितरण हुँदै आएका एक सयभन्दा बढी शङ्कास्पद नक्कली उत्पादन नियन्त्रणमा लिएको छ।

विभागको अनुगमन टोलीले विभिन्न अनलाइन माध्यम र सामाजिक सञ्जालमार्फत बिक्री भइरहेको मासिल तेल, स्याम्पु, चिया, खाद्य पूरक आहारलगायत दैनिक उपभोग्य वस्तु नियन्त्रणमा लिएको हो।

नियन्त्रणमा लिइएका उत्पादनको गुणस्तर, मौलिकता तथा उपभोगयोग्य अवस्थाबारे विभागले परीक्षण गरिरहेको जनाएको छ। परीक्षणबाट उत्पादनको वास्तविक अवस्था यकिन भएपछि सोहीअनुसार आवश्यक कानुनी प्रक्रिया अघि बढाइने विभागको भनाइ छ।

विभागका महानिर्देशक मोतिराम सापकोटाले उपभोक्ताको स्वास्थ्य तथा अधिकार संरक्षणका लागि बजार अनुगमनलाई तीव्र पारिएको बताए। उनले बजारमा नक्कली तथा शङ्कास्पद वस्तुको बिक्री वितरण नियन्त्रण गर्न विभागले अनुगमनलाई प्राथमिकताका साथ अघि बढाएको जानकारी दिए।

उनका अनुसार परीक्षण प्रतिवेदन प्राप्त भएपछि सम्बन्धित उत्पादन तथा व्यवसायीमाथि आवश्यक कानुनी कारबाही प्रक्रिया अघि बढाइनेछ।

विभागले उपभोक्तालाई शङ्कास्पद वा नक्कली उत्पादनको बिक्री वितरणबारे जानकारी भएमा सम्बन्धित निकायमा सूचना दिन आग्रहसमेत गरेको छ।