काठमाडौं । आइतबार बिहान बूढीगण्डकी नदीमा आएको बाढीले निर्माणाधीन चारवटा जलविद्युत् आयोजनामा ठूलो भौतिक तथा संरचनात्मक क्षति पुर्याएको छ। बाढीबाट करिब ४१३ मेगावाट कुल जडित क्षमता भएका आयोजनाका निर्माण संरचना, उपकरण, पहुँच सडक तथा पुलहरू प्रभावित भएका छन्।
स्वतन्त्र ऊर्जा उत्पादकहरूको संस्था, नेपाल (इप्पान) ले सार्वजनिक गरेको प्रारम्भिक विवरणअनुसार बाढीबाट विभिन्न चार जलविद्युत् आयोजनामा क्षति पुगेको हो। आयोजनाहरूमा भौतिक क्षति भए पनि हालसम्म मानवीय क्षतिको विवरण प्राप्त नभएको संस्थाले जनाएको छ।
बाढीबाट सबैभन्दा बढी क्षति टाइम्स इनर्जी प्रालिद्वारा प्रवर्द्धित ३४१ मेगावाट क्षमताको बूढीगण्डकी जलविद्युत् आयोजनामा पुगेको छ। बाढीले आयोजनाको मुख्य निर्माण शिविर क्षेत्र र त्यहाँ रहेका केही उपकरण पूर्ण रूपमा बगाएको छ। उक्त आयोजना निजी क्षेत्रबाट प्रवर्द्धित हालसम्मकै ठूलो अर्धजलाशययुक्त जलविद्युत् आयोजना हो।
त्यस्तै, दोभान खोला हाइड्रोपावर लिमिटेडद्वारा प्रवर्द्धित २४.५ मेगावाट क्षमताको दोभान खोला जलविद्युत् आयोजनामा पनि बाढीले क्षति पुर्याएको छ। आयोजनाको निर्माण शिविर क्षेत्रका केही घरमा क्षति पुगेको छ भने निर्माण कार्यमा प्रयोग हुँदै आएको एउटा बेलिब्रिज बाढीले बगाएको छ।
यसैगरी, यारु हाइड्रो पावर प्रालिद्वारा प्रवर्द्धित ३०.५९ मेगावाट क्षमताको यारु खोला जलविद्युत् आयोजनाको बेलिब्रिजमा क्षति पुगेको छ। आयोजनास्थलमा रहेका विभिन्न निर्माण सामग्री तथा उपकरणसमेत बाढीले बगाएर लगेको प्रारम्भिक विवरणमा उल्लेख छ।
बाढीले वाटर इनर्जी डेभलपमेन्ट प्रालिद्वारा प्रवर्द्धित १६ मेगावाट क्षमताको माछा खोला जलविद्युत् आयोजनाको पहुँच सडक तथा आयोजनास्थलसम्म पुग्ने पुलमा पनि ठूलो क्षति पुर्याएको छ। सडक र पुलमा क्षति पुगेपछि आयोजनास्थलसम्मको आवतजावत तथा निर्माण गतिविधि प्रभावित हुने देखिएको छ।
इप्पानले सार्वजनिक गरेको विवरण प्रारम्भिक भएकाले आयोजनाहरूमा पुगेको आर्थिक क्षतिको यकिन विवरण आउन बाँकी छ। बाढीबाट निर्माणाधीन संरचना तथा उपकरणमा भएको क्षतिले प्रभावित आयोजनाहरूको निर्माण कार्य र निर्धारित समयतालिकामा असर पर्न सक्ने देखिएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
