नागरिक लगानी कोषको बैंक मौज्दातमा २१ करोड ६८ लाखको फरक, हिसाब मिलान गर्नुपर्ने

काठमाडौँ । नागरिक लगानी कोषअन्तर्गत सञ्चालित कर्मचारी बचत वृद्धि अवकाश कोषको बैंक मौज्दातमा २१ करोड ६८ लाख रुपैयाँको फरक देखिएको छ। बैंकको समर्थन पत्रमा उल्लेख भएको मौज्दात र वित्तीय विवरणमा कायम गरिएको रकमबीच फरक देखिएपछि उक्त रकम यकिन गरी हिसाब मिलान गर्नुपर्ने देखिएको हो।

नागरिक लगानी कोष ऐन, २०४७ अन्तर्गत बचत परिचालन, लगानी प्रवर्धन तथा पुँजी बजारसम्बन्धी सेवा प्रदान गर्ने उद्देश्यले स्थापना भएको कोषले कर्मचारी, कामदार तथा विभिन्न संगठित संस्थाबाट विभिन्न शीर्षकमा बचत संकलन गरी लगानी व्यवस्थापन गर्दै आएको छ। कोषले हाल सातवटा कोष तथा योजना सञ्चालन तथा व्यवस्थापन गर्दै आएको छ। कोषको केन्द्रीय कार्यालयसहित विराटनगर, जनकपुर, पोखरा, बुटवल, सुर्खेत र धनगढीमा शाखा कार्यालय रहेका छन्।

कोषको सेयर स्वामित्वमा नेपाल सरकारको २३.३४ प्रतिशत, राष्ट्रिय बिमा संस्थानको ३१.५५ प्रतिशत, नेपाल स्टक एक्सचेन्जको १० प्रतिशत, बैंक तथा वित्तीय संस्थाको १५.११ प्रतिशत तथा सर्वसाधारणको २० प्रतिशत हिस्सा रहेको छ।

कर्मचारी बचत वृद्धि अवकाश कोषतर्फ २०८२ असार मसान्तसम्म २७ वटा बैंक खातामध्ये १२ खातामा १० अर्ब ४८ करोड ४ लाख रुपैयाँ धनात्मक मौज्दात रहेको देखिएको छ। त्यस्तै, बाँकी १५ बैंक खातामा ८ अर्ब ४ करोड ७० लाख रुपैयाँ ऋणात्मक मौज्दात रहेको छ।

धनात्मक र ऋणात्मक मौज्दात समायोजन गर्दा कोषको कुल बैंक मौज्दात २ अर्ब ४३ करोड ३४ लाख रुपैयाँ धनात्मक देखिएको छ। तर बैंकको समर्थन पत्रअनुसार कोषको बैंक मौज्दात २ अर्ब ६५ करोड २ लाख रुपैयाँ रहेको उल्लेख छ।

यसरी बैंकको समर्थन पत्रमा देखिएको मौज्दातको तुलनामा वित्तीय विवरणमा २१ करोड ६८ लाख रुपैयाँ कम रकम देखिएको छ। उक्त फरक रकमको वास्तविकता यकिन गरी आवश्यक हिसाब मिलान गर्नुपर्ने देखिएको छ।