अर्थमन्त्री वाग्ले आर्थिक सुधारका विषयमा वासिङ्टनमा

काठमाडौं — अर्थमन्त्री डा. स्वर्णिम वाग्ले दुई सदस्यीय नेपाली प्रतिनिधिमण्डलको नेतृत्व गर्दै अमेरिकाको वासिङ्टन डीसी पुगेका छन्। विश्व बैंक समूहका अध्यक्ष अजय बाङ्गाको निमन्त्रणामा अमेरिका पुगेका वाग्लेको भ्रमणका क्रममा नेपाल–अमेरिका आर्थिक सहकार्य, पुनर्निर्माण, लगानी विस्तार तथा आर्थिक सुधारका विषयमा उच्चस्तरीय छलफल हुने कार्यक्रम छ।

अर्थमन्त्री वाग्लेले अमेरिकी ट्रेजरी सचिव स्कट बेसेन्ट, विश्व बैंक समूहका अध्यक्ष अजय बाङ्गासहित विश्व बैंक, अमेरिकी ट्रेजरी विभाग र अमेरिकी अन्तर्राष्ट्रिय विकास वित्त निगम (डीएफसी) का उच्च अधिकारीसँग भेटवार्ता गर्नेछन्। त्यस्तै, अमेरिकी निजी क्षेत्रका अग्रणी लगानीकर्तासँग पनि नेपालमा लगानी विस्तारका सम्भावनाबारे छलफल गर्ने कार्यक्रम रहेको छ।

भेटवार्ताका क्रममा नेपालसँगको द्विपक्षीय आर्थिक सहयोग अभिवृद्धि, पुनर्निर्माणका लागि स्रोत परिचालन, वित्तीय कारबाही कार्यदल (एफएटीएफ) को ग्रे सूचीबाट नेपाललाई बाहिर निकाल्ने प्रयास तथा बृहत् आर्थिक सुधारका विषय छलफलको एजेन्डामा रहनेछन्।

भोटेकोशी क्षेत्रमा आएको बाढीबाट क्षतिग्रस्त भौतिक तथा आर्थिक पूर्वाधारको पुनर्निर्माणका लागि थप अन्तर्राष्ट्रिय सहयोग जुटाउने विषयलाई पनि भ्रमणमा प्राथमिकता दिइनेछ। विश्व बैंक तथा अमेरिकी सरकारका प्रतिनिधिसँग बाढी प्रभावित क्षेत्रको पुनर्निर्माणसँगै विपद् प्रतिरोधी तथा उत्थानशील पूर्वाधार विकासका लागि आवश्यक वित्तीय तथा प्राविधिक सहयोग परिचालनबारे छलफल गर्ने कार्यक्रम छ।

सरकारले बाढीबाट क्षतिग्रस्त सडक, पुल, जलविद्युत् तथा अन्य रणनीतिक पूर्वाधारको पुनर्निर्माणका लागि स्रोत परिचालनसँगै आगामी दिनमा पूर्वाधारलाई थप उत्थानशील बनाउने विषयलाई समेत प्राथमिकतामा राखेको छ। यसै सन्दर्भमा विकास साझेदार र निजी क्षेत्रको लगानी बढाउने विषयमा पनि अमेरिकी अधिकारी तथा लगानीकर्तासँग छलफल हुने जनाइएको छ।

वाग्लेले डीएफसीका उच्च अधिकारीसँग नेपालमा पूर्वाधार तथा अन्य सम्भावित क्षेत्रमा लगानी विस्तारका विषयमा छलफल गर्नेछन्। निजी क्षेत्रका लगानीकर्तासँगको भेटमा नेपालमा लगानीका अवसर, रोजगारी सिर्जना तथा आर्थिक गतिविधि विस्तारका सम्भावनाबारे कुराकानी हुने बताइएको छ।

दुईदिने भ्रमणका क्रममा हुने उच्चस्तरीय भेटवार्तालाई नेपालले एकातर्फ बाढीपछिको पुनर्निर्माणका लागि थप अन्तर्राष्ट्रिय स्रोत परिचालन गर्ने र अर्कोतर्फ पूर्वाधार तथा निजी क्षेत्रमा लगानी विस्तारका लागि सहकार्य खोज्ने अवसरका रूपमा अघि बढाएको छ।