काठमाडौँ। रसुवामा बाढीबाट प्रभावित नागरिकको उद्धार, राहत, खोजी तथा पुनर्स्थापनाका लागि निजी क्षेत्रबाट सहयोग जुट्न थालेको छ। यसैक्रममा गोर्खा ब्रुअरीले प्रधानमन्त्री दैवी प्रकोप उद्धार कोषमा १० करोड रुपैयाँ नगद सहयोग उपलब्ध गराएको छ।
बाढी प्रभावित क्षेत्रमा राहत तथा पुनर्स्थापनाका कार्यलाई एकद्वार प्रणालीमार्फत प्रभावकारी रूपमा सञ्चालन गर्ने उद्देश्यले कोषमा प्राप्त सहयोग संकलन तथा परिचालन भइरहेको जनाइएको छ। सोही क्रममा गोर्खा ब्रुअरीले आफ्नो तर्फबाट १० करोड रुपैयाँ सहयोग रकम हस्तान्तरण गरेको हो।
ब्रुअरीका प्रबन्ध निर्देशक अरुण अधिकारी, वित्त निर्देशक अमर वैद्य र बजार निर्देशक काजीमन सुब्बाले अर्थमन्त्री डा. स्वर्णिम वाग्लेलाई उक्त सहयोग रकम हस्तान्तरण गरेका हुन्।
सरकारले कोषमार्फत प्राप्त सहयोगलाई रसुवाका बाढी प्रभावित क्षेत्रमा आवश्यक राहत तथा उद्धार सामग्री व्यवस्थापन, बेपत्ताको खोजी, प्रभावित नागरिकको पुनर्स्थापना तथा अन्य आवश्यक कार्यमा परिचालन गर्ने जनाएको छ।
बाढी तथा पहिरोबाट प्रभावित क्षेत्रमा तत्काल राहत र दीर्घकालीन पुनर्स्थापनाका लागि निजी क्षेत्रबाट समेत सहयोग जुट्न थालेसँगै विपद् व्यवस्थापनमा सरकारी तथा निजी क्षेत्रबीचको सहकार्य थप सुदृढ हुने अपेक्षा गरिएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
