काठमाडौं । सुदूरपश्चिम प्रदेशको प्रमुख धार्मिक तथा पर्यटकीय गन्तव्य बडीमालिका क्षेत्रमा नेपाल टेलिकमले फोरजी मोबाइल सेवा सञ्चालनमा ल्याएको छ। बाजुरा जिल्लामा समुद्री सतहबाट करिब ४ हजार २०० मिटरको उचाइमा रहेको बडीमालिका क्षेत्रमा टेलिकमले टुजीसँगै फोरजी सेवा सञ्चालनमा ल्याएको हो।
नेपाल टेलिकमका अनुसार भदौ ८ गतेदेखि बडीमालिका क्षेत्रमा मोबाइल तथा इन्टरनेट सेवा औपचारिक रूपमा सञ्चालनमा आएको थियो। सेवा विस्तारसँगै उच्च हिमाली तथा भौगोलिक रूपमा विकट क्षेत्रमा सञ्चार पहुँच थप सहज भएको थियो।
बडीमालिकाजस्तो अत्यन्तै विकट र चुनौतीपूर्ण भौगोलिक क्षेत्रमा दूरसञ्चार सेवा विस्तारका लागि नेपाली सेनाको हेलिकप्टरमार्फत आवश्यक उपकरण तथा जडान सामग्री ढुवानी गरिएको थियो। त्यसपछि नेपाल टेलिकमको प्राविधिक टोलीले उपकरण जडान तथा टावर निर्माणको काम अघि बढाएको थियो।
उच्च हिमाली क्षेत्रमा टावर स्थापना गर्न प्राविधिक टोलीले कठिन भौगोलिक तथा प्रतिकूल परिस्थितिमा काम गरेको टेलिकमले जनाएको थियो। निरन्तरको प्रयासपछि बडीमालिका क्षेत्रमा टुजी तथा फोरजी सेवा सञ्चालनमा ल्याउन सफल भएको थियो।
सेवा सञ्चालनमा आएसँगै त्रिवेणी नगरपालिकाका वडा नं. ५ र ६ तथा बडीमालिका नगरपालिकाका वडा नं. ५ र ६ दूरसञ्चार सेवाको पहुँचमा जोडिएका थिए। साथै, बाजुरा सदरमुकाम मार्तडीबाट बडीमालिका जाने पदमार्गमा पर्ने प्रसिद्ध त्रिवेणी पाटनलगायतका क्षेत्रमा समेत मोबाइल सेवा विस्तार भएको थियो।
टावर निर्माण तथा सेवा विस्तारको काममा नेपाल टेलिकमका इन्जिनियर सुदर्शन आचार्य, प्राविधिक अधिकृत माधव बुढाथोकी, सिभिल इन्जिनियर दीपक भट्टलगायतका प्राविधिक कर्मचारी संलग्न थिए।
बडीमालिका क्षेत्रमा सञ्चार सेवा विस्तार भएपछि स्थानीय बासिन्दासँगै धार्मिक तथा पर्यटकीय स्थलको भ्रमणमा आउने भक्तजन, तीर्थयात्री र पदयात्रीलाई सञ्चार सम्पर्कमा सहजता हुने टेलिकमले विश्वास व्यक्त गरेको थियो। उच्च हिमाली क्षेत्रमा दूरसञ्चार पहुँच विस्तारले स्थानीय तथा पर्यटकीय गतिविधिमा समेत सहयोग पुग्ने अपेक्षा गरिएको थियो।
नेपाल टेलिकमका प्रवक्ता डा. कमल लामिछानेले बडीमालिका क्षेत्रमा टुजी तथा फोरजी सेवा सञ्चालनमा ल्याइएको जानकारी दिएका थिए।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
