कांग्रेसको १५औँ महाधिवेशन : नयाँ नेतृत्व चयनका लागि आज मतदान

काठमाडौं। नेपाली कांग्रेसको १५औँ महाधिवेशनअन्तर्गत नयाँ केन्द्रीय नेतृत्व चयनका लागि आज मतदान हुँदैछ। निर्वाचन समितिले सार्वजनिक गरेको संशोधित कार्यतालिकाअनुसार मतदान बिहान १० बजेदेखि साँझ ६ बजेसम्म हुनेछ।

कांग्रेसको नयाँ केन्द्रीय कार्यसमिति चयनका लागि महाधिवेशनमा सहभागी ७ हजार २५५ जना महाधिवेशन प्रतिनिधि मतदानमा सहभागी हुनेछन्। सभापति, पदाधिकारी तथा केन्द्रीय सदस्य पदका उम्मेदवारहरूको अन्तिम नामावली निर्वाचन समितिले बुधबार साँझ सार्वजनिक गरिसकेको छ।

यसअघि निर्वाचन समितिले बिहान ७ बजेदेखि मतदान सुरु गर्ने कार्यतालिका सार्वजनिक गरेको थियो। तर भारी वर्षा तथा केही प्राविधिक कारणले मतदानको समय तीन घण्टा पछि सारिएको निर्वाचन समितिले जनाएको छ। केन्द्रीय निर्वाचन समितिका संयोजक एवं वरिष्ठ अधिवक्ता प्रेमबहादुर खड्काका अनुसार अब बिहान १० बजेदेखि मतदान सुरु हुनेछ।

महाधिवेशन प्रतिनिधिको प्रदेश तथा प्रतिनिधित्वका आधारमा विभिन्न स्थानमा छुट्टाछुट्टै मतदान केन्द्र तोकिएको छ। संशोधित निर्वाचन कार्यतालिकाअनुसार बागमती प्रदेशका प्रतिनिधिले राष्ट्रियसभा गृहमा रहेको मतदान केन्द्र ‘क’ बाट मतदान गर्नेछन्।

त्यस्तै, खुलामञ्चमा रहेको मतदान केन्द्र ‘ख’ मा कोशी प्रदेश र तराई–मधेस समूहका प्रतिनिधिका लागि मतदानको व्यवस्था गरिएको छ। गण्डकी प्रदेशका प्रतिनिधिले हिमाल हलबाट तथा मधेस प्रदेशका प्रतिनिधिले तराई–मधेस हलबाट मतदान गर्नेछन्।

लुम्बिनी, कर्णाली र सुदूरपश्चिम प्रदेशका प्रतिनिधिसँगै नेपाली जनसम्पर्क समिति तथा भ्रातृ संस्थातर्फका प्रतिनिधिका लागि खुलामञ्चमा रहेको पहाड हल मा मतदान केन्द्र तोकिएको छ।

निर्वाचन समितिले मतदान स्थलमा प्रवेश गरेपछि प्रतिनिधिहरूलाई आफूलाई तोकिएको प्रदेश वा समूहको मतदान केन्द्रमा गई मतदान गर्न आग्रह गरेको छ। मतदानअघि प्रतिनिधिको परिचयपत्र तथा मतदाता नामावली रुजु गरिनेछ।

निर्वाचन आचारसंहिताअनुसार मतदान स्थलमा मोबाइल फोनलगायत निषेधित सामग्री लिएर प्रवेश गर्न पाइने छैन। आवश्यक प्रक्रिया पूरा गरेपछि मात्र प्रतिनिधिले मतदान गर्न पाउने निर्वाचन समितिले जनाएको छ।

मतदानबाट सभापति, उपसभापति, महामन्त्री, सहमहामन्त्री तथा विभिन्न समूहअन्तर्गतका केन्द्रीय सदस्य चयन हुनेछन्। मतदान सम्पन्न भएपछि मतगणना सुरु गर्ने तयारी निर्वाचन समितिले गरेको छ।

यसैबीच, कांग्रेसको १५औँ महाधिवेशनले विधान संशोधन गर्दै केन्द्रीय कार्यसमिति २९७ सदस्यीय बनाएको छ। नयाँ नेतृत्व चयनका लागि हुने निर्वाचनले सोही संरचनाअनुसार नयाँ केन्द्रीय कार्यसमिति चयन गर्नेछ।