तिब्बती भाषा पढाउन देहरादुन लैजाँदै गरिएका २५ बालबालिका भारतीय सीमाबाट फिर्ता, प्रहरीले थाल्यो अनुसन्धान

कञ्चनपुर। तिब्बती भाषा अध्ययन गराउने भन्दै भारतको देहरादुन लैजाँदै गरिएका १० वर्षमुनिका २५ नेपाली बालबालिकालाई भारतीय सीमा सुरक्षा जाँच चौकीले नेपाल फर्काएको छ। कञ्चनपुरको गड्डाचौकी नाका हुँदै भारत प्रवेश गरेका उनीहरूलाई बनबासास्थित जाँच चौकीबाट फिर्ता पठाइएको हो।
हुम्लाको सिमकोट गाउँपालिका–८, सेयराका ती बालबालिकालाई पञ्चपविर बुढाले भारत लैजाँदै गरेको प्रारम्भिक विवरणमा उल्लेख छ। देहरादुनमा तिब्बती भाषा अध्ययन गराउने उद्देश्यले बालबालिकालाई लगिएको बताइए पनि उनीहरूको भर्ना कुन शैक्षिक संस्थामा गराउने तयारी थियो भन्ने खुल्न सकेको छैन।
भारतीय पक्षले बनबासास्थित जाँच चौकीमा रोकेर नेपाल फर्काएका बालबालिकालाई कञ्चनपुर प्रहरीको जिम्मा लगाइएको छ। प्रहरीले उनीहरूलाई भारत लैजानुको वास्तविक उद्देश्य तथा त्यससँग सम्बन्धित परिस्थितिबारे अनुसन्धान अघि बढाएको जनाएको छ।
विशेषगरी बालबालिकालाई विदेश लैजानुअघि अभिभावकको सहमति लिइएको थियो वा थिएन भन्ने विषय स्पष्ट हुन बाँकी छ। साथै, उनीहरूको शैक्षिक व्यवस्थापन, बसोबास तथा जिम्मेवारी लिने संस्थाका सम्बन्धमा समेत थप विवरण सार्वजनिक भएको छैन।
एकैपटक ठूलो संख्यामा नाबालक बालबालिकालाई सीमा पार गराइएको घटनामा आवश्यक प्रक्रिया पूरा गरिएको थियो वा थिएन भन्ने विषय अनुसन्धानबाट खुल्ने अपेक्षा गरिएको छ।
कञ्चनपुर प्रहरीले घटनाका सम्बन्धमा थप तथ्य संकलन भइरहेको जनाउँदै विस्तृत विवरण आउन बाँकी रहेको बताएको छ।