अमेरिकन सेन्टरको तेस्रो सिपअप कार्यक्रम सम्पन्न

काठमाडौँ – अमेरिकन सेन्टरद्वारा आयोजित ‘सिपअप’ शृङ्खलाअन्तर्गत तेस्रो कार्यक्रम “मानव शक्ति : नेतृत्व र सञ्चार सीप विकास” काठमाडौँमा सम्पन्न भएको छ। कार्यक्रम काठमाडौँबाट प्रत्यक्ष सञ्चालन गरिएको थियो भने विराटनगर, भैरहवा, पोखरा र सुर्खेत स्थित अमेरिकन केन्द्रहरूमार्फत समेत प्रत्यक्ष प्रसारण गरिएको थियो।

कार्यक्रममा सञ्चार तथा नेतृत्व विकास विशेषज्ञ एवं अमेरिकी सरकारका पूर्व विद्यार्थी क्षितु रिसाल प्रमुख वक्ताका रूपमा सहभागी हुनु भएको थियो। उहाँले राष्ट्रिय तथा बहुराष्ट्रिय संस्थामा रहेको एघार वर्षभन्दा बढीको अनुभवका आधारमा प्रभावकारी सञ्चार, नेतृत्व शैलीको पहिचान, सक्षम टोली निर्माण, सिर्जनात्मक समस्या समाधान तथा व्यावसायिक सम्बन्ध विस्तारका व्यावहारिक उपायहरू सहभागीहरूसँग साझा गर्नुभयो।

सत्रका क्रममा रिसालले व्यक्तिगत पहिचान निर्माण र रणनीतिक सञ्चार ले नयाँ अवसरहरू सिर्जना गर्न कसरी सहयोग पुर्‍याउँछ भन्ने विषयमा आफ्ना व्यक्तिगत अनुभव प्रस्तुत गर्नुभयो। यसबाट सहभागी युवा पेशेवरहरूले करियर विकासका लागि आवश्यक व्यवहारिक ज्ञान प्राप्त गरेका थिए।

अमेरिकन सेन्टरको सिपअप शृङ्खलाले उदीयमान उद्यमी तथा युवा पेशेवरहरूलाई आवश्यक सीप, आत्मविश्वास र नेतृत्व क्षमताबाट सशक्त बनाउँदै नेपालको आर्थिक लचकता मजबुत बनाउन योगदान पुर्‍याइरहेको आयोजकले जनाएको छ। साथै, यस पहलले क्षेत्रीय स्थायित्व प्रवर्द्धन गर्दै नेपालजस्ता उदीयमान बजारमा अमेरिकी कम्पनीहरूका लागि सम्भावना विस्तार गर्न सहयोग पुग्ने अपेक्षा गरिएको छ।

आगामी सिपअप कार्यक्रममा सहभागी हुन इच्छुकहरूले नजिकको अमेरिकन सेन्टरमार्फत जानकारी लिन सक्ने जनाइएको छ।