क्यानडाको विद्यालयमा गोलीकाण्ड :१० जनाको मृत्यु, २५ भन्दा बढी घाइते

काठमाडौँ । क्यानडाको ब्रिटिश कोलम्बिया प्रान्तमा रहेको एउटा विद्यालयमा भएको गोलीकाण्डमा एक महिला प्रहरीसहित कम्तीमा आठ जनाको ज्यान गएको छ। मृतकमध्ये गोली चलाउने व्यक्ति पनि परेको हुन सक्ने अनुमान गरिएको छ। क्यानेडियन अधिकारीहरूका अनुसार नजिकैको एउटा घरमा थप दुई जना मृत अवस्थामा फेला परेका छन्।

रोयल क्यानेडियन माउन्टेड प्रहरी (आरसीएमपी) ले टम्बलर रिज माध्यमिक विद्यालयमा भएको घटनामा २५ भन्दा बढी व्यक्ति घाइते भएको जनाएको छ। घाइतेमध्ये दुई जनाको अवस्था गम्भीर रहेको र अस्पतालमा उपचार भइरहेको छ। क्यानडामा विद्यालयमा यस्तो किसिमको घटना निकै कम हुने बताइएको छ।

टम्बलर रिज सहर करिब २ हजार ४ सय जनसंख्या भएको सानो बस्ती हो, जुन अल्बर्टा प्रान्तको सिमानानजिक भ्यानकुभरबाट करिब १ हजार किलोमिटरभन्दा टाढा उत्तरतर्फ पर्छ। उक्त विद्यालयमा कक्षा ७ देखि १२ सम्मका करिब १७५ विद्यार्थी अध्ययनरत छन्।

आरसीएमपीका सुपरिटेन्डेन्ट केन फ्लोयडले एक महिला संदिग्ध पहिचान गरिएको भए पनि नाम सार्वजनिक नगरिएको जानकारी दिए। घटनाको कारण अझै स्पष्ट नभएको र पीडितहरू गोली चलाउने व्यक्तिसँग कसरी सम्बन्धित थिए भन्ने विषयमा अनुसन्धान जारी रहेको उनले बताए।

गोली चलिरहेको खबर पाएपछि प्रहरी विद्यालयभित्र प्रवेश गर्दा धेरै पीडित फेला परेका थिए। प्रहरीका अनुसार गोली चलाउने व्यक्ति मानिएको एक जना पनि मृत भेटिएका छन्, जसको मृत्यु आत्महत्या जस्तो देखिएको छ।