भदौ २३ र २४ का घटनामा संलग्न सबैमाथि निष्पक्ष छानबिन गर्न गगन थापाको माग

काठमाडौं । नेपाली कांग्रेसका सभापति गगन थापाले भदौ २३ र २४ गते भएका घटनामा संलग्न सबै पक्षमाथि निष्पक्ष छानबिन गरी दोषीलाई कानुनी कारबाही गर्न सरकारसँग माग गरेका छन्।

बीपी स्मृति दिवसका अवसरमा भिडियो सन्देश जारी गर्दै थापाले भदौ २४ गते आफू र आफ्नो परिवारसमेत प्रभावित हुने गरी घरमा आगजनी भएको स्मरण गरे। यद्यपि, आफ्नो घर जलेको व्यक्तिगत पीडाभन्दा उक्त घटनामा ज्यान गुमाएका तथा घाइते भएका युवाको पीडा ठूलो रहेको उनले बताए।

थापाले भदौ २३ गते शान्तिपूर्ण आन्दोलनमाथि भएको राज्य दमन र आन्दोलनभित्र घुसपैठ गरी हिंसा भड्काउने व्यक्तिहरूको पहिचान गरी कारबाही गर्नुपर्ने बताए। उनका अनुसार भदौ २४ गते सिंहदरबार, अदालतलगायत सार्वजनिक संरचनामा भएको आगजनी तथा तोडफोडका घटनाको समेत निष्पक्ष अनुसन्धान आवश्यक छ।

उनले आन्दोलनका क्रममा व्यक्त भएको स्वाभाविक आक्रोश र त्यसलाई प्रयोग गरी गरिएका आपराधिक गतिविधिलाई एउटै रूपमा हेर्न नहुने बताए। आवेगमा व्यक्त भएको प्रतिक्रियालाई क्षमायोग्य मान्न सकिए पनि आवेगको प्रयोग गरी अपराध गर्ने व्यक्तिले कानुनी उन्मुक्ति पाउन नहुने उनको भनाइ थियो।

थापाले भदौ २४ गते भएको घटनाको निष्पक्ष अनुसन्धान गर्ने प्रतिबद्धता सरकारले यसअघि नै जनाएको स्मरण गराउँदै अनुसन्धान र छानबिन कहाँ पुगेको हो भन्ने प्रश्न गरेका छन्। साथै, भदौ २३ गतेका घटनासम्बन्धी अध्ययनको पूर्ण प्रतिवेदन सार्वजनिक गर्न पनि उनले माग गरे।

उनले भदौ २३ गते आन्दोलनमाथि दमन गर्ने तथा हिंसा भड्काउने र भदौ २४ गते सार्वजनिक तथा निजी सम्पत्तिमा आगजनी, तोडफोड र अन्य आपराधिक गतिविधिमा संलग्न सबैको निष्पक्ष छानबिन हुनुपर्ने बताए। दोषी देखिएका व्यक्तिमाथि कानुनअनुसार कारबाही भए मात्र राज्य जवाफदेही बन्ने दिशामा अघि बढ्न सक्ने उनको भनाइ छ।

भदौ २४ गतेको घटनालाई व्यक्तिगत पीडाका रूपमा मात्र हेर्न नहुने उल्लेख गर्दै थापाले त्यस दिन भएको ठूलो जनधनको क्षति र त्यसबाट प्रभावित परिवारको पीडालाई गम्भीर रूपमा लिनुपर्ने बताए। उनले घटनाका कारण जीवनभर असर पर्ने गरी घाइते भएका युवाको अवस्थालाई समेत राज्यले सम्बोधन गर्नुपर्ने धारणा राखे।

थापाले सार्वजनिक संरचनामा भएको आगजनी तथा ध्वंसका घटनामा कसको संलग्नता थियो, कसले योजना बनायो र कसरी राज्यको सुरक्षा तथा प्रशासनिक संयन्त्र प्रभावहीन बन्न पुग्यो भन्ने विषयमा समेत अनुसन्धान आवश्यक रहेको बताए।

उनले दण्डहीनतालाई प्रश्रय दिँदा भविष्यमा समेत यस्ता घटना दोहोरिन सक्ने चेतावनी दिए। अपराधमा संलग्न व्यक्तिलाई राजनीतिक वा अन्य कुनै आधारमा उन्मुक्ति दिन नहुने भन्दै उनले भदौ २३ र २४ दुवै दिन भएका आपराधिक गतिविधिको निष्पक्ष अनुसन्धान गरी दोषीलाई कारबाही गर्नुपर्नेमा जोड दिए।

‘भदौ २३ मा अपराध गर्नेले पनि सजाय पाउनुपर्छ र २४ मा अपराध गर्नेले पनि सजाय पाउनुपर्छ,’ थापाले भने, ‘अनि मात्रै राज्य जवाफदेही राज्य बन्ने बाटोमा अगाडि बढ्न सक्छ।’