आज देशभर महाशिवरात्रि पर्व श्रद्धा र भक्तिपूर्वक मनाइँदै,

काठमाडौँ । प्रत्येक वर्ष फाल्गुन कृष्ण चतुर्दशीको मध्यरातमा मनाइने महाशिवरात्रि पर्व आज देशभर श्रद्धा र भक्तिपूर्वक मनाइँदै छ। आराध्यदेव भगवान् शिवको विधिपूर्वक पूजा, आराधना र दर्शन गरी वैदिक सनातन हिन्दू धर्मावलम्बीहरूले यो पर्व उल्लासका साथ मनाएका छन्।

आज दिउँसो १६ः५२ बजेसम्म त्रयोदशी तिथि रहेको र त्यसपछि चतुर्दशी तिथि सुरु हुने बताइएको छ। चतुर्दशी तिथि सोमबार दिउँसो १७ः३५ बजेसम्म रहनेछ। मध्यरातमा चतुर्दशी तिथि आइतबार परेकाले आजकै दिन महाशिवरात्रि पर्व मनाउने निर्णय गरिएको नेपाल पञ्चाङ्ग निर्णायक विकास समितिले जनाएको छ।

समितिका अनुसार फाल्गुन कृष्ण चतुर्दशीको मध्यरातमा परब्रह्मले शिवरूप धारण गरेको शास्त्रीय मान्यता रहेको छ। यही कारण मध्यरातमा चतुर्दशी तिथि परेको दिन पूजा, आराधना र दर्शन गरे यस लोकमा सुख–शान्ति र परलोकमा सद्गति प्राप्त हुने विश्वास रहेको समितिका सदस्य प्रा.डा. देवमणि भट्टराईले जानकारी दिएका छन्।

महाशिवरात्रिका अवसरमा भक्तजनहरू बिहानैदेखि नदी, कुण्ड तथा तलाउमा स्नान गरी शिवालयमा गई उपवास, जागरण र विशेष पूजाआराधनामा सहभागी भएका छन्। शिवजीको उत्पत्ति भएको रातका आधारमा नामकरण गरिएको यो पर्व कालरात्रि, मोहरात्रि, सुखरात्रि र शिवरात्रि नामक चार प्रमुख रात्रिमध्ये एक पवित्र पर्वका रूपमा शिवपुराणलगायत धार्मिक ग्रन्थहरूमा उल्लेख गरिएको छ।