देशभर चार हजारभन्दा बढी पर्यवेक्षक परिचालन

काठमाडौं – गैरसरकारी संस्था महासंघ नेपाल, राष्ट्रिय निर्वाचन पर्यवेक्षण समिति, सामान्य निर्वाचन पर्यवेक्षण समिति तथा निर्वाचन पर्यवेक्षण समिति नेपालले संयुक्त रूपमा प्रारम्भिक अनुगमन प्रतिवेदन सार्वजनिक गरेका छन्। राजधानी काठमाडौंमा आयोजित पत्रकार सम्मेलनमार्फत सार्वजनिक गरिएको प्रतिवेदनमा निर्वाचन आयोगले निर्वाचनका लागि आवश्यक प्रशासनिक तथा व्यवस्थापकीय तयारी पूरा गरेको निष्कर्ष प्रस्तुत गरिएको छ।

पत्रकार सम्मेलनमा बोल्दै गैरसरकारी संस्था महासंघ नेपालका अध्यक्ष अर्जुन भट्टराईले चारवटै संस्थाबाट देशभर चार हजारभन्दा बढी निर्वाचन पर्यवेक्षक परिचालन गरिएको जानकारी दिनुभयो। उहाँका अनुसार मतदान प्रक्रिया, मतगणना तथा समग्र निर्वाचन वातावरणको सूक्ष्म निगरानी गर्ने उद्देश्यले पर्यवेक्षकहरू परिचालन गरिएका हुन्।

अध्यक्ष भट्टराईले स्वतन्त्र, निष्पक्ष र धाँधलीरहित निर्वाचन सुनिश्चित गर्नु नै चारवटै संस्थाको साझा लक्ष्य रहेको स्पष्ट पार्नुभयो। उहाँले अनुगमनका क्रममा प्राप्त तथ्य र निष्कर्षहरू मतदानअगाडि तथा मतदानपछिसमेत सार्वजनिक गरिने प्रतिबद्धता व्यक्त गर्नुभयो।

यसैबीच, अलग्गै भेटघाट कार्यक्रममा संयुक्त प्रारम्भिक अनुगमन प्रतिवेदन (प्रेस वक्तव्य) निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीलाई औपचारिक रूपमा हस्तान्तरण गरिएको छ। प्रतिवेदन डा. गोपालकृष्ण सिवाकोटी र अर्जुन भट्टराईले संयुक्त रूपमा बुझाउनुभएको हो।

प्रतिवेदन ग्रहण गर्दै कार्यवाहक प्रमुख निर्वाचन आयुक्त भण्डारीले नागरिक समाजबाट हुने अनुगमनले निर्वाचन प्रक्रियामा पारदर्शिता र विश्वास अभिवृद्धि हुने बताउनुभयो। निर्वाचनलाई विश्वसनीय र जनअपेक्षाअनुसार सम्पन्न गर्न आयोग प्रतिबद्ध रहेको उहाँको भनाइ थियो।