निर्वाचनअघि विशेष महाधिवेशन आवश्यक : कांग्रेसभित्र दबाब

काठमाडौँ । नेपाली कांग्रेसभित्र विशेष महाधिवेशनको माग तीव्र बनेको छ। महाधिवेशन प्रतिनिधिहरूको हस्ताक्षरसहित दर्ता गरिएको निवेदनमा प्रतिनिधि सभाको निर्वाचन अगावै पार्टीको नयाँ नेतृत्व चयन गर्नुपर्ने आवश्यकता औंल्याइएको छ।

भदौ २३ र २४ पछि नेपालको राजनीति नयाँ मोडमा प्रवेश गरेको भन्दै प्रतिनिधिहरूले आज आयोजित पत्रकार सम्मेलनमा बदलिँदो राजनीतिक परिवेशलाई आत्मसात गर्दै पार्टीलाई समयमै दिशा दिनुपर्ने आवश्यकता दोहोर्‍याए।

नेता गुरु घिमिरेले पार्टी विधानअनुसार विशेष महाधिवेशन माग गर्ने अधिकार प्रतिनिधिहरूकै भएको भन्दै यसको अवमूल्यन गर्ने छुट कसैलाई नभएको प्रष्ट पारे। त्यस्तै नेता मनोजमणि आचार्यले तीव्र गतिमा अघि बढिरहेको राष्ट्रिय राजनीतिमा ढिलाइ र अलमलको ठाउँ नरहेको बताए।

ध्यानाकर्षण पत्रमा आगामी फागुन २१ गते घोषणा भएको प्रतिनिधि सभाको निर्वाचनअघि महाधिवेशन सम्पन्न गरी नयाँ नेतृत्वसहित चुनावमा जानुपर्ने उल्लेख छ। अन्यथा कांग्रेस कमजोर बन्ने चेतावनी दिइएको छ।

प्रतिनिधिहरूले केन्द्रीय कार्यसमितिको बैठक अनावश्यक रुपमा लम्ब्याइएको भन्दै आपत्ति जनाएका छन्। असोज २८ बाट सुरु भएको बैठक अझै टुंगोमा नपुग्नु र छठपछि मात्रै अर्को बैठक बोलाइएको प्रसंगलाई उनीहरूले समयमै महाधिवेशन नगर्ने संकेतको रुपमा व्याख्या गरेका छन्।