काठमाडौँ। नेपाल राष्ट्र बैंक (NRB) र भारतीय रिजर्व बैंक (RBI) बीचको संयुक्त समन्वय संयन्त्र को नवौँ बैठक आज काठमाडौँमा सम्पन्न भएको छ।
बैठकको उद्घाटन गर्दै नेपाल राष्ट्र बैंकका गभर्नर प्रा.डा. विश्वनाथ पौडेलले मौद्रिक र वित्तीय क्षेत्रका अन्तरदेशीय सरोकारहरू समाधान गर्न यस्तो संयन्त्र प्रभावकारी प्लेटफर्म भएको बताउनुभयो। उहाँले मौद्रिक नीति, विदेशी विनिमय व्यवस्थापन, नियमन र भुक्तानी प्रणालीमा उत्कृष्ट अभ्यासहरूको आदानप्रदानले दुवै मुलुकका केन्द्रीय बैंकबीचको सम्बन्ध अझ सुदृढ भएको उल्लेख गर्नुभयो।
गभर्नर पौडेलले आगामी दिनमा जेटीसीसी मार्फत प्राविधिक सहयोग, क्षमता अभिवृद्धि र नीति समन्वयलाई अझ गहिरो बनाउने विश्वास व्यक्त गर्नुभयो। उद्घाटन सत्रमा डेपुटी गभर्नर बमबहादुर मिश्र पनि उपस्थित हुनुहुन्थ्यो।
भारतीय रिजर्व बैंकका कार्यकारी निर्देशक तथा संयोजक अर्णबकुमार चौधरीले जेटीसीसी गठन भएयता मुद्रा व्यवस्थापन, वैदेशिक व्यापार र भुक्तानी कारोबारमा सहकार्यका सफल अभ्यासहरू कार्यान्वयनमा आएको बताउनुभयो।
बैठकको दोस्रो सत्रमा दुवै बैंकका अधिकारीबीच अन्तरदेशीय भुक्तानी प्रणाली, मौद्रिक नीति, तरलता व्यवस्थापन, विदेशी विनिमय र डिजिटल पेमेंट प्रणालीका सुधारका विषयमा विस्तृत छलफल भएको थियो। साथै, आठौँ बैठकमा भएका एजेण्डाहरूको कार्यान्वयन अवस्थामाथि समीक्षा गरिएको थियो।
बैठकमा राष्ट्र बैंकका कार्यकारी निर्देशक रेवतीप्रसाद नेपाल, विश्रुत थापा, डा. रामशरण खरेल, डा. डिल्लीराम पोख्रेल लगायत सहभागी थिए। आरबीआईतर्फबाट कार्यकारी निर्देशक चौधरीसहित महाप्रबन्धक लथा राधाकृष्णन, सास्वतकुमार महापात्र र प्रबन्धक अपर्णा वकिल सहभागी थिए।
बैठकपश्चात् भारतीय प्रतिनिधिहरूले भारतको समष्टिगत आर्थिक अवस्था र भुक्तानी प्रणालीको विकासक्रमबारे प्रस्तुति दिएका थिए। जेटीसीसी सन् २०१६ मे १३ मा दुई केन्द्रीय बैंकबीच नीति तथा वित्तीय सहकार्य सुदृढ गर्नका लागि गठन गरिएको हो।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
