“भोटको ज्ञान टिकटकमा, नगद पुरस्कार हातमा!”

काठमाण्डौ। निर्वाचन आयोग, नेपालले प्रतिनिधि सभा सदस्य निर्वाचन, २०८२ लाई लक्षित गरी निर्वाचन प्रचार–प्रसार, निर्वाचन आचारसंहिता तथा मतदाता शिक्षासम्बन्धी सन्देश प्रवाह गर्ने उद्देश्यले टिकटक भिडियो प्रतियोगिता आयोजना गरेको छ।

यस प्रतियोगिताअन्तर्गत इच्छुक सहभागीहरूले निर्वाचनसम्बन्धी विविध विषयवस्तुमा आधारित एक मिनेटसम्मको टिकटक भिडियो निर्माण गरी आफ्नो टिकटक, फेसबुक तथा युट्युव एकाउन्ट (च्यानल) मा अपलोड गर्नुपर्नेछ। अपलोड गरिएको भिडियोको लिंक २०८२ फागुन ३ गतेदेखि १७ गतेसम्म आयोगको इमेल ठेगाना [email protected] मा पठाउनुपर्नेछ।

आयोगमा प्राप्त भएका भिडियोहरूमध्ये सबैभन्दा बढी दर्शक (भ्यु) प्राप्त गर्ने उत्कृष्ट तीन वटा भिडियोलाई आयोगको तर्फबाट क्रमशः रु. ५०,०००, रु. ३०,००० र रु. २०,००० नगद पुरस्कारसहित प्रमाणपत्र प्रदान गरिनेछ।

प्रतियोगिताका शर्तहरू

१. टिकटक भिडियो प्रतिनिधि सभा सदस्य निर्वाचन, २०८२ को परिवेशमा आधारित हुनुपर्नेछ।
२. भिडियो संवादमूलक तथा सन्देशमूलक हुनुपर्नेछ। आफ्नै मौलिक अडियो तथा अभिनय भएको भिडियोलाई प्राथमिकता दिइनेछ।
३. निर्वाचनको सामान्य जानकारी, निर्वाचनको आवश्यकता र महत्त्व, मतपत्रमा छाप लगाउने सही तरिका, निर्वाचन आचारसंहिताको पालना, मतदाताको अधिकार तथा कर्तव्य, मतदाताले कस्तो उम्मेदवार छनोट गर्नुपर्छ भन्ने विषयवस्तुमा आधारित भिडियो बनाउन सकिनेछ।
४. एक व्यक्तिले एउटै विषयमा एउटा मात्र भिडियो पठाउन सक्नेछ। दुई वा दुईभन्दा बढी व्यक्ति सहभागी भई संयुक्त रूपमा भिडियो निर्माण गर्न सकिनेछ।
५. यसरी प्राप्त भएका सबै भिडियोहरूमाथि निर्वाचन आयोगको अधिकार रहनेछ र आवश्यकताअनुसार आयोगका सामाजिक सञ्जालमार्फत प्रसारण गर्न सकिनेछ।
६. तोकिएका शर्तहरूको पालना नभएका वा म्याद नाघी प्राप्त भएका भिडियोहरू स्वीकार गरिने छैन।
७. उत्कृष्ट भिडियोको छनोट स्वतन्त्र विज्ञ समिति तथा निर्वाचन आयोगबाट गरिनेछ।