काठमाडौँ महानगरपालिकाले यँयाः विशेष कार्यक्रम थालनी गर्यो

काठमाडौँ। काठमाडौँ महानगरपालिकाले यस वर्षदेखि यँयाः (इन्द्रजात्रा) विशेष कार्यक्रम ‘पूजासहित परम्परागत नृत्य प्रदर्शन तथा प्रसाद ग्रहण (नेवा भ्वय)’ को थालनी गरेको छ। यो कार्यक्रम धार्मिक, सांस्कृतिक र सामाजिक प्रतिष्ठासँग सम्बन्धित नृत्यहरूको प्रदर्शन गर्ने उद्देश्यले आयोजना गरिएको हो।

महानगरपालिकाले गुठियारहरूको प्रोत्साहन र प्रवर्धनका लागि कार्यक्रम आयोजना गरेको जनाएको छ। कार्यक्रममा सजावट गरिएको समयवजीलाई विशेष महत्व दिइएको थियो।

यस अवसरमा मजिपा लाखे, महाकाली, सवःभकु र पुलुकिसि नृत्य प्रस्तुत गरिएको थियो। कार्यक्रममा महानगरपालिकाका प्रमुख बालेन्द्र शाह (बालेन) ले देवगणहरूको पूजा गरेका थिए। प्रवक्ता नविन मानन्धर, मूल समारोह समितिका संयोजक आशामान संगत र अन्य पदाधिकारीहरूले पनि विशेष पूजामा सहभागिता जनाएका थिए।

कार्यक्रममा प्रशासकीय अधिकृत प्रदीप परियार, कार्यपालिका सदस्य, नगरसभा सदस्य र विभागीय प्रमुखहरूको उपस्थिति रहेको थियो। नृत्य अवलोकन गर्न उपत्यकाका नगर प्रमुख, उपप्रमुख र प्रमुख प्रशासकीय अधिकृतलाई आमन्त्रण गरिएको थियो।

नृत्य प्रदर्शनको क्रममा, प्रमुख बालेनले पुलुकिसि नृत्यमा चिराक बोकेर सहभागी भएका थिए। यस अवसरमा उनले पुलुकिसि नृत्य सञ्चालन गर्ने किलाघः त्वा सांस्कृतिक बाजा संरक्षण समितिलाई १ लाख रुपैयाँको चेक हस्तान्तरण गरेका थिए। नृत्य प्रदर्शन गर्ने हरेक समूहलाई १ लाख रुपैयाँको अनुदान प्रदान गरिएको छ।

प्रवक्ता मानन्धरले भने, “जात्राका अवसरमा प्रदर्शन हुने यस्ता नृत्यहरूलाई नजिकबाट अवलोकन गर्न र मौलिकता जोगाउन विशेष नृत्य प्रदर्शनी आयोजना गरिएको हो। महानगरपालिकाले जात्रा सञ्चालन र व्यवस्थापनमा अभिभावकीय भूमिका निर्वाह गरिरहेको छ।”

संगतले भने, “विशेष प्रदर्शनीले यँयामा नयाँ आयाम थप गरेको छ। हरेक गुठियारलाई जात्रा सञ्चालन र व्यवस्थापनमा प्रोत्साहित गर्दै उनीहरूलाई नेपाल मण्डलको पहिचानलाई जीवन्त बनाउने अपेक्षा गरिएको छ।” नृत्य प्रदर्शनीको समापनपछि प्रसाद ग्रहण कार्यक्रम पनि आयोजना गरिएको थियो।