राष्ट्रिय परिचयपत्रसम्बन्धी सेवा आंशिक अवरुद्ध, मर्मत सम्पन्न भएपछि मात्रै नियमित संचालन हुने

काठमाडौं — राष्ट्रिय परिचयपत्र तथा पञ्जीकरण विभागले राष्ट्रिय परिचय व्यवस्थापन सूचना प्रणाली (National Identity Management Information System) को नियमित मर्मत तथा क्षमता विस्तार कार्यका कारण विभिन्न सेवा आंशिक रूपमा अवरुद्ध भएको जनाएको छ।

विभागका सूचना अधिकारी शिवराज सेढाईंका अनुसार, मर्मत कार्य सम्पन्न नहुँदासम्म विभागसँग सम्बन्धित कतिपय सेवा प्रवाह अस्थायी रूपमा रोकिएको छ। अवरुद्ध सेवामा अनलाइनमार्फत राष्ट्रिय परिचयपत्र विवरण संकलन तथा कार्ड वितरण, विवरण सच्याउने सेवा, जन्मदर्ताका क्रममा राष्ट्रिय परिचय नम्बर प्रदान गर्ने सेवा, सामाजिक सुरक्षा भत्ता वितरणका लागि लाभग्राहीको नाम दर्ता र नवीकरण गर्दा जैविक विवरण प्रमाणीकरण गर्ने प्रक्रिया लगायत प्रणालीसँग अन्तरआबद्ध अन्य सार्वजनिक सेवा समावेश छन्।

विभागले सार्वजनिक सूचना जारी गर्दै मर्मत कार्य सकेलगत्तै सेवा सुचारु गरिने स्पष्ट पारेको छ। विभागले आइतबारदेखि नै सेवा आंशिक रूपमा रोकिएको जानकारी गराएको हो।

यद्यपि, राष्ट्रिय परिचयपत्र विवरण संकलन र वितरणसम्बन्धी काम अफलाइन प्रणालीबाट यथावत सञ्चालन गर्न सकिने भएकाले, देशभरका सेवा इकाइहरूलाई सोहीअनुसार कार्य सञ्चालन गर्न निर्देशन दिइएको विभागले जनाएको छ। साथै, अफलाइन प्रणालीबाट विवरण दर्ता गराएका सेवाग्राहीहरूलाई अनलाइन सेवा पुनः सुचारु भएपछि राष्ट्रिय परिचय नम्बर एसएमएसमार्फत उपलब्ध गराइने जानकारी पनि विभागले दिएको छ।

विभागले सेवाग्राही तथा सरोकारवालाहरूलाई असुविधाका लागि क्षमायाचना गर्दै आवश्यक सहयोग गर्न अनुरोध गरेको छ।