काठमाडौं । संयुक्त राज्य अमेरिकाबाट सुरु भएको विश्वव्यापी मनोरञ्जन मञ्च ‘वर्ल्ड अफ डान्स’ को नेपाल संस्करण सन् २०२६ का लागि औपचारिक रूपमा शुभारम्भ गरिएको छ। यस पहलमार्फत नेपाली प्रतिभालाई अन्तर्राष्ट्रिय स्तरको सिर्जनात्मक सञ्जालसँग जोड्ने उद्देश्य राखिएको आयोजकले जनाएको छ। काठमाडौंमा आयोजित पत्रकार सम्मेलनमार्फत कार्यक्रम सार्वजनिक गरिएको हो।
कार्यक्रमको शुभारम्भमा नेपालस्थित अमेरिकी दूतावासको समेत सहयोग रहेको जनाइएको छ। दूतावासका जनसम्पर्क प्रमुख माइक हार्करले कार्यक्रममा सहभागिता जनाउँदै सिर्जनात्मक उद्योगको प्रवर्द्धन, आर्थिक अवसरको विस्तार तथा सांस्कृतिक सम्बन्ध सुदृढ बनाउन संयुक्त राज्य अमेरिकाको प्रतिबद्धता रहेको बताए। उनले नेपाली कलाकारलाई अन्तर्राष्ट्रिय मञ्चमा पुर्याउने यस्तो पहलले दीर्घकालीन रूपमा मनोरञ्जन क्षेत्रलाई बलियो बनाउने विश्वास व्यक्त गरे।
वर्ल्ड अफ डान्स नेपालमार्फत नेपाली कलाकारहरूलाई अमेरिकी तथा विश्वव्यापी सिर्जनात्मक र सञ्चार क्षेत्रसँग सहकार्य गर्ने अवसर प्राप्त हुने अपेक्षा गरिएको छ। यसले नेपालभित्रै मनोरञ्जन उद्योगको विस्तारमा टेवा पुर्याउनुका साथै अन्तर्राष्ट्रिय स्तरमा प्रतिस्पर्धा गर्ने क्षमता विकास गर्ने लक्ष्य राखिएको छ।
उक्त कार्यक्रममा अभिनेता दयाहाङ राई, कलाकार कविता नेपाली लगायतका चर्चित व्यक्तित्वहरूको उपस्थिति रहेको थियो। उनीहरूले यस्ता अन्तर्राष्ट्रिय मञ्चहरूले नेपाली प्रतिभालाई विश्वमा चिनाउने महत्वपूर्ण अवसर प्रदान गर्ने धारणा व्यक्त गरेका थिए।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
