भारतीय अवरोधपछि इलामका सबै चिया उद्योग बन्द

काठमाडौँ । भारतले नेपाली चियामा कडा गुणस्तर परीक्षण लागू गरेपछि निर्यातमा समस्या बढेको भन्दै इलामका सबै ५६ वटा चिया उद्योग सोमबारदेखि बन्द भएका छन्। नेपाल चिया उत्पादक संघका अनुसार झापाका ३० वटा चिया उद्योग पनि बुधबारदेखि बन्द गरिनेछन्।

उद्योगीहरूका अनुसार भारतले परीक्षणका नाममा नेपाली चिया रोकेपछि करिब २ लाख किलो चिया भारतीय गोदाममा थन्किएको छ भने १० लाख किलोभन्दा बढी चिया नेपालमै बिक्री हुन नसकी बिग्रिने अवस्थामा पुगेको छ। नेपाली चियाको करिब ९० प्रतिशत बजार भारत भएकाले उद्योग, किसान र मजदुर सबै प्रभावित भएका छन्।

यस क्षेत्रसँग करिब एक लाख मजदुर र ३० हजार किसान परिवार जोडिएका छन्। समस्या समाधानका लागि सरकारले प्रभावकारी पहल नगरेको भन्दै उद्योगीहरूले आन्दोलनको तयारी गरेका छन्। उनीहरूले काँकरभिट्टा नाकामा भारतीय सामान प्रवेश रोक्ने र नाका अवरुद्ध गर्ने चेतावनी दिएका छन्।