सेनाको नेतृत्व समीकरणमा नयाँ मोड, रथी बढुवाका लागि अनुपजंग थापाको नाम सिफारिस

काठमाडौं । नेपाली सेनाको भावी नेतृत्वका सम्भावित दाबेदार मानिएका उपरथी अनुपजंग थापा रथी पदमा बढुवाका लागि सिफारिस भएका छन्। रथी प्रदीपजंग केसीको अध्यक्षतामा बसेको बढुवा समितिको बैठकले थापाको नाम सिफारिस गरेको हो।

रथी गणेश श्रेष्ठ मङ्सिर ७ गते अवकाशमा जाने भएपछि रिक्त हुने पदमा थापालाई बढुवा गर्न सिफारिस गरिएको हो। बढुवा प्रक्रिया पूरा भई रथीमा पदोन्नति भएमा उनी वर्तमान प्रधानसेनापति अशोकराज सिग्देलपछिको सैन्य नेतृत्वका सम्भावित उत्तराधिकारीका रूपमा रहनेछन्।

बढुवा समितिले थापाको सिफारिससम्बन्धी सूचना सोमबार सार्वजनिक गर्दै निर्णयप्रति चित्त नबुझ्ने सम्बन्धित पक्षलाई सात दिनभित्र उजुरी दिन सक्ने व्यवस्था गरेको छ। तोकिएको अवधिमा प्राप्त उजुरीको प्रक्रिया पूरा भएपछि बढुवासम्बन्धी थप निर्णय अघि बढ्नेछ।

यसैबीच, बढुवा समितिका अध्यक्षसमेत रहेका रथी प्रदीपजंग केसी आगामी मङ्सिर १५ गते अवकाशमा जाने भएका छन्। उनको अवकाशपछि रिक्त हुने रथी पदमा उपरथी मधुकर कार्की सिफारिस हुन सक्ने सम्भावना रहेको छ। यद्यपि, त्यससम्बन्धी औपचारिक निर्णय भइसकेको छैन।

नेपाली सेनाको उच्च नेतृत्वमा हुने यी पदोन्नति र अवकाशले आगामी प्रधानसेनापतिको उत्तराधिकार क्रमलाई समेत प्रभावित पार्ने देखिएको छ।