५९ ड्रोन आक्रमणपछि मस्कोका चार विमानस्थल बन्द

एजेन्सी । रुसको राजधानी मस्कोमा सोमबार ड्रोन आक्रमणको खतरा देखिएपछि चारवटा विमानस्थल केही समयका लागि बन्द गरिएको छ। पछि अवस्था नियन्त्रणमा आएपछि उडान सेवा फेरि सुरु गरिएको अधिकारीहरूले बताएका छन्।

मस्कोका मेयर सर्गेई सोब्यानिनका अनुसार शहरतर्फ आउँदै गरेका ५९ वटा ड्रोन नष्ट गरिएको छ। उनले ड्रोन कहाँ खसालियो भन्नेबारे विस्तृत जानकारी दिएका छैनन्। घटनापछि आपतकालीन सेवाहरू प्रभावित क्षेत्रमा पठाइएको थियो।

आक्रमणको डरका कारण शेरेमेत्येभो, डोमोडेडोभो, भ्नुकोभो र झुकोभस्की विमानस्थलमा उडान केही समय रोकिएको थियो। बिहान करिब ५स्३९ बजेपछि विमानस्थलहरू पुनः सञ्चालनमा आएका हुन्।

यसअघि पनि मस्को नजिकको तेल रिफाइनरीमा ड्रोन आक्रमण भएको थियो, जसलाई हालैका वर्षहरूमा भएको ठूलो आक्रमणमध्ये एक मानिएको छ। त्यस समयमा करिब २०० ड्रोन खसालिएको दाबी गरिएको थियो।

यसैबीच, रुसले कब्जा गरेको क्रिमियाको सेवास्तोपोल शहरमा सार्वजनिक कार्यक्रमहरू रद्द गरिएको छ र सडक बत्तीहरू बन्द राखिएको छ। त्यहाँका बासिन्दालाई बिजुली प्रयोग कम गर्न पनि आग्रह गरिएको छ। साथै, केही क्षेत्रमा इन्धन बिक्रीमा पनि प्रतिबन्ध लगाइएको छ।