डीडीसीको घिउ पहिलोपटक दुबई निर्यात

काठमाडौँ । सरकारी स्वामित्वको दुग्ध विकास संस्थान (डीडीसी) ले पहिलोपटक आफ्नो घिउ अन्तर्राष्ट्रिय बजारमा निर्यात गरेको छ। नेपाली दुग्धजन्य उत्पादनलाई विदेशी बजारमा चिनाउने उद्देश्यले डीडीसीले घिउको पहिलो खेप संयुक्त अरब इमिरेट्स (यूएई) को दुबई पठाएको हो।

पहिलो चरणमा ३५० मिलिलिटरका १ हजार २०० वटा जारमा गरी करिब ४२० लिटर अर्थात् ६ सय किलो घिउ पठाइएको छ। यसको लागत करिब ५ लाख ५० हजार रुपैयाँ रहेको डीडीसीले जनाएको छ। दुबईका ग्राहकका लागि घिउ आकर्षक सिसाका जारमा प्याक गरिएको छ।

दुबईमा रहेको एक ठूलो डिपार्टमेन्ट स्टोरको मागपछि घिउ हवाई मार्गबाट पठाइएको हो। बजार राम्रो भए भविष्यमा समुद्री मार्गबाट ठूलो परिमाणमा निर्यात गर्ने डीडीसीको योजना छ।

‘रातो र चन्द्र सूर्य इन्टरनेसनल’ मार्फत निर्यात गरिएको घिउले दुबईमा आवश्यक गुणस्तर र खाद्य सुरक्षा मापदण्ड पूरा गरेको बताइएको छ। बजार स्थापित भएपछि अन्य मध्यपूर्वी देशमा पनि घिउ पुर्‍याउने योजना छ। भविष्यमा पनिर, बटर र दूध पाउडरजस्ता उत्पादन पनि निर्यात गर्ने तयारी भइरहेको छ।