लाल आयोगको प्रतिवेदन तत्काल सार्वजनिक गर्न गगन थापाको माग

काठमाडौँ । नेपाली कांग्रेसका सभापति गगन थापाले मधेस तथा थरुहट आन्दोलनका क्रममा भएका घटनाबारे छानबिन गर्न बनेको लाल आयोगको प्रतिवेदन तत्काल सार्वजनिक गर्न सरकारसँग माग गरेका छन्।

थापाले सामाजिक सञ्जालमार्फत आफ्नो धारणा राख्दै राजनीतिक दलहरूले विगतमा सरकारमा जानुअघि प्रतिवेदन सार्वजनिक गर्ने वाचा गरे पनि सरकारमा पुगेपछि त्यो काम पूरा गर्न नसकेको स्वीकार गरेका छन्। उनका अनुसार २०७४ सालदेखि नै हरेक वर्ष लाल आयोगको प्रतिवेदन सार्वजनिक गर्नुपर्ने आवाज उठ्दै आएको छ।

२०७३ सालमा गठन भएको लाल आयोगले आन्दोलनका क्रममा भएका घटनाको छानबिन गरी सरकारलाई प्रतिवेदन बुझाएको थियो। तर, अहिलेसम्म प्रतिवेदन सार्वजनिक गरिएको छैन। यसका कारण घटनाको वास्तविकता बाहिर आउन नसकेको र पीडितले न्याय पाउन कठिन भएको थापाको भनाइ छ।

थापाले विगतका सरकारहरूले प्रतिवेदन सार्वजनिक गर्न नसकेको कमजोरी अब पनि दोहोरिन नहुने बताएका छन्। उनले प्रधानमन्त्री तथा मन्त्रिपरिषद्को कार्यालयलाई कुनै थप ढिलाइ नगरी प्रतिवेदन सार्वजनिक गर्न आग्रह गरेका छन्। नागरिकलाई सत्य थाहा पाउने र पीडितलाई न्याय पाउने अधिकार रहेको उनको भनाइ छ।