
काठमाडौं । सरकारले राष्ट्रिय कर दिवस, २०८३ को अवसरमा विभिन्न १९ विधामा उत्कृष्ट करदातालाई सम्मान गरेको छ। आर्थिक वर्ष २०८१/८२ मा विभिन्न क्षेत्रबाट सबैभन्दा बढी कर दाखिला गर्ने कम्पनी, संस्था तथा व्यक्तिलाई आन्तरिक राजस्व विभागले विशेष कार्यक्रम आयोजना गरी सम्मान गरेको हो।
मूल्य अभिवृद्धि कर ऐन, २०५२ लागू भएको दिन २०५४ मंसिर १ गतेको स्मरणमा सरकारले २०६९ सालदेखि राष्ट्रिय कर दिवस मनाउँदै आएको छ। यसअघि १६ विधामा उत्कृष्ट करदातालाई सम्मान गरिँदै आएकोमा यस वर्ष विधाको संख्या बढाएर १९ पुर्याइएको हो।
यस वर्ष विभिन्न व्यावसायिक क्षेत्रबाट सबैभन्दा बढी आयकर दाखिला गर्ने करदाताका रूपमा सूर्य नेपाल प्रालि सम्मानित भएको छ। एकलौटी फर्मतर्फ थर्ड आई इन्टरनेसनलले सम्मान प्राप्त गरेको छ भने वस्तु निर्याततर्फ डाबर नेपाल प्रालि र सूचना प्रविधिसम्बन्धी सेवा निर्याततर्फ इन्फाइनाइट सफ्टवेयर सर्भिसेस नेपाल उत्कृष्ट करदाता घोषित भएका छन्।
त्यस्तै, कृषि तथा पशुपन्छीजन्य उद्योगतर्फ ओसिबी फुड्स एन्ड फिड्स प्रालि सम्मानित भएको छ। बैंकिङ क्षेत्रबाट नबिल बैंक उत्कृष्ट करदाता बनेको छ भने स्वास्थ्य तथा शैक्षिक संस्थातर्फ नोबेल मेडिकल कलेज टिचिङ हस्पिटलले सम्मान प्राप्त गरेको छ। पर्यटन व्यवसायमा सबैभन्दा बढी कर दाखिला गर्ने सोल्टी होटल लिमिटेड पनि सम्मानित भएको छ।
वस्तु व्यापारतर्फ सीजी इम्पेक्स प्रालि उत्कृष्ट करदाता बनेको छ। वार्षिक ५० करोडदेखि १ अर्ब रुपैयाँसम्म कारोबार गर्ने करदातामध्ये फुड एन्ड बेभरेज टेक्नोलोजी रिसर्च सेन्टर प्रालि सम्मानित भएको छ। त्यस्तै, ऊर्जामूलक उद्योगतर्फ भोटेकोशी पावर कम्पनी प्रालि र रेमिट्यान्स तथा मनी ट्रान्सफर व्यवसायमा आईएमई लिमिटेडले सम्मान प्राप्त गरेका छन्।
व्यक्तिगत आयकरतर्फ सबैभन्दा बढी आयकर दाखिला गर्ने राजबहादुर शाह सम्मानित भएका छन्। त्यसैगरी, मूल्य अभिवृद्धि कर विवरण तथा सोअनुसारको कर समयमै दाखिला गरी नियमित कर सहभागिता जनाउने करदातामध्ये हिमालयन डिस्टिलरी लिमिटेडले सम्मान पाएको छ।
वार्षिक ५० करोड रुपैयाँसम्म कारोबार गर्ने करदातामध्ये इम्पेरियल सेक्युरिटिज कम्पनी लिमिटेड उत्कृष्ट करदाता बनेको छ। विशेष उद्योगतर्फ वरुण बेभरेज नेपाल प्रालि सम्मानित भएको छ।
बीमा तथा वित्तीय क्षेत्रतर्फ जीवन बीमा कम्पनीमध्ये लाइफ इन्स्योरेन्स कर्पोरेसन नेपाल र निर्जीवन बीमा कम्पनीमध्ये सिद्धार्थ प्रिमियर इन्स्योरेन्स लिमिटेड सम्मानित भएका छन्। लघुवित्त क्षेत्रबाट छिमेक लघुवित्त वित्तीय संस्था लिमिटेडले उत्कृष्ट करदाताको सम्मान प्राप्त गरेको छ।
सम्मान कार्यक्रममा अर्थमन्त्री डा. स्वर्णिम वाग्ले, नेपाल राष्ट्र बैंकका गभर्नर डा. विश्वनाथ पौडेललगायतको उपस्थिति रहेको थियो।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे