काठमाडौँ । सरकारले सामाजिक सञ्जालमाथि लगाएको प्रतिबन्धविरुद्ध पत्रकारहरूले आइतबार राजधानीको माइतीघरमण्डलामा प्रदर्शन गरेका छन्। नेपाल पत्रकार महासंघ र नेपाल प्रेस युनियनको अगुवाइमा भएको प्रदर्शनमा पत्रकारहरूले ब्यानरसहित सडकमा उत्रेर अभिव्यक्ति स्वतन्त्रता संरक्षणको माग गरेका हुन्।
‘सञ्जाल बन्द, आवाज बन्द’, ‘जनताको मुख थुन्न पाइँदैन’, ‘अभिव्यक्ति स्वतन्त्रता हाम्रो अधिकार’, ‘सरकारले हान्यो पेटमा लात, खोसियो हाम्रो दाल र भात’ जस्ता नारासहित प्रदर्शनकारीहरूले सरकारको निर्णयलाई अलोकतान्त्रिक भन्दै तत्काल फिर्ता गर्न माग गरेका थिए।
पत्रकार अगुवाहरूले सामाजिक प्लेटफर्म बन्द गरेर सरकारले नागरिक अधिकारमाथि गम्भीर आघात पुर्याएको टिप्पणी गर्दै सर्वोच्च अदालतको आदेशलाई उलङ्घन गरिएको आरोप लगाए। उनीहरूको भनाइमा, अभिव्यक्ति स्वतन्त्रता संविधानले सुनिश्चित गरेको अधिकार हो र यसलाई सरकारले रोक्न सक्दैन।
यसअघि सरकारले सामाजिक सञ्जाल सूचीकरण अनिवार्य गर्ने निर्णय गरेको थियो। दूरसञ्चार प्राधिकरणलाई दिएको निर्देशनअनुसार फेसबुक, युट्युब, ह्वाट्सएप, एक्स (ट्विटर), इन्स्टाग्रामलगायत २६ भन्दा बढी सामाजिक सञ्जाललाई सूचीकरण नभएको भन्दै बन्द गर्ने परिपत्र गरिएको थियो।
सञ्जाल बन्द भएपछि विशेषगरी कन्टेन्ट क्रिएटर, अनलाइन सञ्चारमाध्यम, स्टार्टअप कम्पनी र विज्ञापन व्यवसायीहरू प्रभावित बनेका छन्। उनीहरूले व्यवसायिक गतिविधि र रोजगारीसमेत संकटमा परेको गुनासो गरेका छन्। यसअघि सर्वोच्च अदालतले सामाजिक सञ्जालको प्रयोगलाई व्यवस्थित गर्ने निर्देशिकाअनुसार मात्र कारबाही गर्न आदेश दिए पनि सरकारको कदम सो आदेशको विपरीत रहेको पत्रकारहरूको भनाइ छ।
नेपाल पत्रकार महासंघले प्रेस स्वतन्त्रता र अभिव्यक्ति स्वतन्त्रता कुण्ठित हुने निर्णय कहिल्यै स्वीकार्य नहुने भन्दै आगामी दिनमा अझै व्यापक आन्दोलन गर्न चेतावनी दिएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
