दिउँसो दुई बजेसम्म त्रेसठ लाखभन्दा बढी मत खस्यो,३३.४१ प्रतिशत मतदान

काठमाडौँ । निर्वाचन आयोगले सार्वजनिक गरेको पछिल्लो विवरणअनुसार देशभर जारी प्रतिनिधिसभा सदस्य निर्वाचनमा करिब तेह्र बजेर पचास मिनेटसम्म कुल मतदाताको ३३.४१ प्रतिशतले मतदान गरिसकेका छन्। बिहान सात बजेदेखि सुरु भएको मतदान देशभरका अधिकांश मतदान केन्द्रमा शान्तिपूर्ण रूपमा निरन्तर भइरहेको आयोगले जनाएको छ।

आयोगका अनुसार दोलखा जिल्लाको एउटा मतदान केन्द्रमा भने प्राविधिक तथा स्थानीय कारणले मतदान सुरु हुन नसकेको छ। अन्य सबै स्थानमा भने सामान्य विवादका घटनाबीच पनि मतदान प्रक्रिया अवरुद्ध नभई निरन्तर सञ्चालन भइरहेको सहायक प्रवक्ता कुलबहादुर जिसीले जानकारी दिए। उनका अनुसार दिउँसो दुई बजेसम्म देशभर त्रेसठ लाख सोह्र हजार दुई सय पन्ध्र मत खसेको विवरण आयोगको प्रणालीमा अभिलेख भएको छ।

निर्वाचन आयोगले देशभर मतदाताको सहभागिता उत्साहजनक रहेको र अधिकांश मतदान केन्द्रमा मतदाता शान्तिपूर्ण रूपमा लामबद्ध भएर मतदान गरिरहेको जनाएको छ। आयोगका अनुसार हालसम्म मतदान प्रक्रिया स्वतन्त्र, निष्पक्ष र उल्लासमय वातावरणमा अघि बढिरहेको छ र कुनै पनि गम्भीर प्रकृतिको अवरोध देखिएको छैन।

निर्वाचन आयुक्त डा. जानकीकुमारी तुलाधरले अहिलेसम्म देशका कुनै पनि मतदान केन्द्रमा मतदान कार्य पूर्ण रूपमा नरोकिएको स्पष्ट पारिन्। उनले सबै स्थानमा मतदान सहज र व्यवस्थित रूपमा सञ्चालन भइरहेको जानकारी दिँदै आम मतदाताले उच्च उत्साहका साथ आफ्नो मताधिकार प्रयोग गरिरहेको बताइन्।

सुरक्षा व्यवस्थाबारे जानकारी दिँदै आयुक्त डा. तुलाधरले यस पटकको निर्वाचनमा सुरक्षा संयन्त्र प्रभावकारी रूपमा परिचालन गरिएको र मतदान केन्द्रको वातावरण शान्त तथा भयरहित रहेको उल्लेख गरिन्। उनले बेलुका पाँच बजेसम्म मतदानको समय कायम रहेकाले बाँकी मतदातालाई समयमै मतदान केन्द्र पुगेर आफ्नो अमूल्य मत प्रयोग गर्न आयोगले आग्रह गरेको जानकारी दिइन्।