राष्ट्रिय वाणिज्य बैंक लिमिटेडको कोशी प्रदेश सभाका सदस्यहरूको लागि वित्तीय साक्षरता सम्बन्धी अभिमुखीकरण कार्यक्रम सम्पन्न

काठमाडौँ, २५ भदौ – राष्ट्रिय वाणिज्य बैंक लिमिटेडको आयोजनामा कोशी प्रदेश सभाका सदस्यहरूको लागि वित्तीय साक्षरता सम्बन्धी अभिमुखीकरण कार्यक्रम मंगलबार सम्पन्न भएको छ। कार्यक्रमको आयोजना कोशी प्रदेश सभाको सहकार्य र विफक्याब संस्थाको समन्वयमा गरिएको थियो।

उक्त कार्यक्रममा राष्ट्रिय वाणिज्य बैंकका प्रमुख कार्यकारी अधिकृत देवेन्द्ररमण खनाल र राष्ट्रिय योजना आयोगका पूर्व उपाध्यक्ष तथा नेपाल राष्ट्र बैंकका पूर्व गभर्नर दीपेन्द्रबहादुर क्षत्रीले प्रदेश सभाका सदस्यहरूलाई वित्तीय साक्षरताको बारेमा सहजीकरण गर्नुभएको थियो। खनालले बैंकको वर्तमान अवस्था र अर्थतन्त्रमा गरेको योगदानको बारेमा जानकारी प्रदान गर्नुभएको थियो भने क्षत्रीले वित्तीय नीति, मौद्रिक नीति र करका माध्यमबाट स्रोत परिचालन, बजेट निर्माण र कानूनी आधारको बारेमा प्रष्ट पार्नुभयो।

कोशी प्रदेश सभाका सभामुख अम्बरबहादुर बिष्टले वित्तीय साक्षरता सम्बन्धी यस्तो कार्यक्रमको आवश्यकता बढेको औंल्याउँदै व्यवसायीहरूको ब्याजदरका कारण पलायनको जोखिम रहेको उल्लेख गर्नुभयो। उहाँले यसलाई रोक्नका लागि बैंकहरूको ब्याजदर स्थिर हुनुपर्ने आवश्यकता व्यक्त गर्नुभयो। त्यसैगरी, उपसभामुख सिर्जना दनुवारले विद्यालय तहको पाठ्यक्रममा वित्तीय साक्षरतालाई समावेश गर्नुपर्नेमा जोड दिनुभयो।

कार्यक्रममा संघीय संसद सचिवालयका सचिव सुदर्शन खड्का, कोशी प्रदेश सभाका सचिव गोपालप्रसाद पराजुली, बैंकका उपकार्यकारी अधिकृत पवन रेग्मी, विभागीय प्रमुख आनन्द सुवेदी र विफक्याब संस्थाका प्रमुख मनोज रेग्मी लगायतका कर्मचारीहरूको उपस्थिति रहेको थियो। हाल, राष्ट्रिय वाणिज्य बैंकले ७७ जिल्लामा २९४ शाखा कार्यालय, ३१० एटीएम र ७३ एक्स्टेन्सन काउण्टर सञ्चालन गर्दै आएको छ।