पूर्वराष्ट्रपति विद्यादेवी भण्डारीको पहिलो पत्रकार सम्मेलन आज, राजनीतिक सन्देश आउन सक्ने अनुमान

काठमाडौं । पूर्वराष्ट्रपति विद्यादेवी भण्डारी पहिलोपटक पत्रकार सम्मेलन गर्न लागेकी छन्। उनले शुक्रबार दिउँसो ३ बजे बानेश्वरस्थित कार्की ब्यांक्वेटमा पत्रकार सम्मेलनको आयोजना गरेकी हुन्। राष्ट्रपतिको कार्यकाल सकिएपछि अपेक्षाकृत कम सार्वजनिक उपस्थितिमा देखिएकी भण्डारीले यसपटकको पत्रकार सम्मेलनमार्फत राजनीतिक सन्देश दिन सक्ने आँकलन गरिएको छ।

पूर्वराष्ट्रपति भण्डारीले केही समयअघि सक्रिय राजनीतिमा फर्किने संकेत दिएकी थिइन्। तर, नेकपा एमालेको पछिल्लो निर्णयले उनको राजनीतिक पुनरागमनमा अवरोध सिर्जना भएको देखिएको छ। मंगलबार सम्पन्न एमाले केन्द्रीय कमिटी बैठकले भण्डारीको पार्टी सदस्यता नवीकरण नगर्ने निर्णय गर्दै पार्टी राजनीतिमा संलग्न हुन रोक लगाउने आधिकारिक घोषणा गरिसकेको छ।

पार्टी निर्णयपछि भण्डारीले कुनै औपचारिक प्रतिक्रिया जनाएकी छैनन्। यस्तै परिस्थितिमा आयोजित पत्रकार सम्मेलनलाई राजनीतिक वृत्तले विशेष चासोका साथ हेरिरहेको छ। पूर्वराष्ट्रपति भण्डारीको भनाइले आगामी दिनमा उनी सक्रिय राजनीति फर्किन्छिन् वा स्वतन्त्र राजनीतिक यात्राको संकेत दिन्छिन् भन्ने अनुमान गर्न सकिने विश्लेषकहरूको भनाइ छ।